Í Fredericia er fótbóltslagið gott í kvøld. Tað eydnaðist føroyska landsliðsspælaranum, Rógva Balvinsson, og liðfeløgum hansara í FC Fredericia at koppa OB í donsku steypakappingini við einum 2-1 heimasigri.
Talan er um eitt fótbóltsroysnið, tí FC Fredericia spælir í næstbestu donsku fótbóltsdeildini, meðan OB spælir í bestu donsku fótbóltsdeildini.
Rógvi spældi allan dystin á tamb í verjuni hjá Fredericia. Tá 70 minuttir vóru farnir fekk Rógvi tað gula kortið.
Admir Catovic legði Fredericia á odda í 37. minutti. Minuttin aftaná javnaði OB til 1-1 við máli, sum Kenneth Zohore skeyt. Sigursmálið hjá Fredericia skeyt Oliver Feldballe, tá 9 minuttir vóru eftir av vanligu leiktíðini.
Sambært heimasíðuni hjá FC Fredericia var tað serliga í fyrra hálvleiki, at Rógvi og hinir í verjuni høvdu nóg mikið at síggja til, tí tá trýsti OB nógv.
1.680 áskoðarar sóu minniliga sigurin hjá Fredericia, sum er víðari til 4. umfar í donsku steypakappingini.
