Hetta er ein hugnalig tíð, nú farið er um longsta dag, og tað gongur fram ímóti hásumri. Viðhefta mynd er tikin á Sandi í morgun. Fremst sæst ein eplavelta, sum er farin at seta nálir og spíra.
Longri úti í myndini sæst, at bóndir hava sligið bøin fyrstu ferð í summar, og á Sandi er ikki óvanligt, at bøurin verður sligin tvær ella tríggjar ferðir, sum summarið og heystið ganga.
Nakrir bóndir eru á Sandi, sum velta nógv epli, kanska eini tvey tons í part, sum - um alt gongur væl, og grøðin eydnast - kunnu fáa eini 10 tons av góðum eplum uppaftur.
Veðrið hevur verið gott higartil í summar, og tað hevur verið rættiliga turt. Seinastu tíðina hevur Várharra tó latið nakrar dropar av regni fallið av himli, og tað man hava verið gott fyri bæði gras og epli.
