Leiðslan er sum vera man væl nøgd, og nú verður farið undir at gera enn fleiri nýíløgur.
– Tað hevur eydnast okkum at skapa størri yvirskot, aftur í ár. Tað eri eg ótrúliga væl nøgd við, sigur Gudny Langgard, stjóri í Vodafone.
Úrslitið áðrenn fíggjarpostar og skatt er eitt avlop á 8,8 milliónir krónur. Tað eru 3,5 milliónir krónur betri enn árið fyri, tá hædd verður tikið fyri ekstraordinerum viðurskiftum á 3,2 milliónir krónur í 2012, boðar Vodafone frá.
– Øll starvsfólkini hava verið við til at bøta um ársúrslitið við at gera raksturin effektivari og økja um søluna. Teirra partur hevur ikki ligið eftir, og vit ætla at halda kósina í 2014, sigur Gudny Langgaard.
– Fyri Vodafone er avgerandi, at kundarnir fáa nútímans tænastur. Hetta til fyrimuns fyri kappingarstøðu okkara og til gleði fyri kundarnar, sigur Gudny Langgaard.
Leiðslan væntar, at úrslitið í 2014 verður á sama støði sum í 2013. Leiðslan í Vodafone hevur merkt framgongd í fíggjarstøðuni í samfelagnum í 2013, men enn er ivasamt, um og í hvønn mun framgongdin er støðug.
Gudny Langgaard sigur, at aftur og aftur hava tey greitt frá tí neyðuga í, at fjarskiftislóggávan verður dagførd, so kappingin á fjarskiftisøkinum gerst javnbjóðis og virknari, alt til fyrimuns fyri kundarnar á føroyska marknaðinum.
Henda boðskap endurtekur fyritøkan í ár.
Fakta um Vodafone:
Navn: Vodafone (Kall pf.)
Tænastuøki: Heildarveitari innan
breiðband, fastnet og fartelefoni
Stovnað: 1999
Byrjað tænastur: 2001
Yvirskot fyrstu ferð: 2004
Eginogn: 36,1 mió.kr.
Javni: 68,1 mió.kr.
Solvensur: 52,9%
Langfreistað skuld: 1,8 mió.kr.
Starvsfólkatal: 33
Stjóri: Gudny Langgaard (síðani 2011)
