Í samband við, at tað í september í ár eru liðin 10 ár, síðan Giljagarður í Leirvík læt upp, verður bjóðað til móttøku á sambýlinum í morgin, hósdagin 18. september frá klokkan 15-17.
Jóhan Christiansen, borgarstjóri í Eysturkommunu og Karl Joensen úr Søldarfirði, umboð fyri avvarðandi, fara at bera fram røðu. Unn Justinussen, leiðari fyri eldrasambýlini í Eysturkommunu, fer eisini at siga nøkur orð um Giljagarð.
Við móttøkuna verður felagssangur og sangframførsla við Paulu Gaard og Bárði á Lakjuni, og borðreitt verður við einum drekkamunni og føðingardagskaku.
- Øll eru hjartaliga vælkomin at halda dagin saman við okkum á Giljagarði, siga tey, sum standa aftan fyri móttøkutiltakið í Leirvík.
