RÁKIÐ hevur í fleiri ár verið, at alt fleiri fakfeløg fáa avtalur um eftirlønarskipanir. Alt gott um tað, men vit eiga ikki at gloyma, at tað eru partar í samfelagnum, sum ikki hava henda møguleika - arbeiðsleys, avlamin, fólk á smábygdum osfr. - og í teimum førum er Samhaldsfati einasta alternativið, um fólkapensjónin ikki verður hækkað munandi.Hinvegin, verður Tjóðveldisflokkurin við til at gera eina tvungna, individuella pensjónsskipan - meinlíkari fólkatryggingini hjá Fólkaflokkinum - sum gevur fólki eftirløn í mun til inngjald, ger flokkurin eitt risafet frá solidaritetsprincippinum, ið hevur eyðkent politikkin á pensjónsøkinum. Verður hetta leiðin, verður torført at venda aftur. Og hvat verður tá tað næsta - brúkaragjøld á almanna- og heilsøkinum?
AVTALUR, sum fakfeløg hava gjørt, eru komnar væl við. T.d. skipanin hjá Havnar Arbeiðsmannafelag, ið fleiri ferðir hevur fingið rós á hesum stað. Tí varð tað ein loddrøtt lygn, tá Bjarni Djurholm í tinginum henda dagin segði,at Sosialurin hevur niðurgjørt hesa skipan.Tvørturímóti. Henda skipanin er samhaldsføst, og er eitt frálíkt ískoyti hjá arbeiðsmonnum í Havn. Hóast Dagblaðið hevur skamróst skipanini, so skerst ikki burtur, at Fólkaflokkurin virkaði fyri eini skipan, ið ikki byggir á samhaldsfesti.
VIT eiga at endurskoða pensjónsviðurskiftini frá grundini, gera eina ?Hvítbók? og tá tað er gjørt, eiga vit fyribils at bøta verandi skipanir. Tað er umráðandi at fáa eina breiða semju um pensjónsmálið, so tað ikki verður politisk kastibløðka. Og her áttu Tjóðveldisflokkur og Javnaðarflokkur, sum vilja umboða tey veiku, at royna at draga eina línu.Tíðin er komin hartil, at hesir flokkar gera sær greitt, hvat Fólkaflokkurin stendur fyri.
