– Sum so mangan sagt, so síggja oljufeløgini økini báðumegin markið meira ella minni sum eina og somu »provins«. Herfyri kom fram, at bretska stjórnin hevði gjørt av at lækka skattin, har talan var um at fáa gongd á útbygging av gassleiðum. Og hetta heldur Petur Joensen vera áhugavert.
Positiv fyri okkum
– Tá virksemi tekur seg upp – tað veri seg bretsku megin ella okkara megin markið – so er tað gott fyri »provinsin«, t.d. sýnist tað sum at útbyggingarætlanin hjá Total av gassleiðingini til Hetlands hevur havt betri útlit fyri at verða framd, nú skatturin verður lækkaður. Og tann útbyggingin kann eisini vera positiv fyri oljuleitingina her um okkara leiðir – ella skuldi kanska sagt gassleitingina um so verður, at henda leiðingin kann verða nýtt til at flyta gass av Føroyaøkinum, og landsstýrismaðurin annars loyvir tí. Tess betri infrakervi, tess minni forðingar fyri at fara undir leiting bæði okkara megin og bretsku megin. So tað verður sera spennandi at síggja, hvørja ávirkan hetta fer at fáa, sigur stjórin á Jarðfeingi.
Føroysk vinna lut
Her er so talan um eina so mikið stóra útbyggingætlan, at stjórin á Jarðfeingi heldur, at kanska áttu føroyskir veitarar av vørum og tænastum til kolvetnisvinnunu at ligið framvið og kannað møguleikarnar. Fjarstøðan er ikki long, og fleiri føroyskir veitarar hava prógvað sítt dugnasemi, so teir hava eitt gott útgangsstøði í so máta.
– Umframt hesa stóru ætlan hjá Total og DONG skilst, at eisini aðrar útbyggingarætlanir eru vestan fyri Hetland. Hetta hevur heilt vist við sær, at fleiri feløg fáa eyguni upp fyri økinum.
So tíðindini úr Bretlandi eru góð. Og higani eru sanniliga eisini góð tíðindi, nú tríggir brunnar standa fyri framman á Føroyaøkinum. Alt í alt eru útlitini fyri leitivirkseminum á hesum leiðum hugalig heldur Jarðfeingisstjórin.
