Fróði Benjaminsen spælir fríggjakvøldið sín landsdyst nummar 83. Tað ájavnt metinum hjá Óla Johannesen. Høgri bakkurin á føroyska landsliðnum, Jónas Tór Næs, hevur stóra virðing fyri liðskiparanum á landsliðnum, sum hann kallar fyri eina fyrimynd.
Hoyr samrøðuna við Jónas Tór Næs við at trýsta á pílin undir myndini
- Fróði er heilt ótrúliga raskur. Hann er týdningarmikil fyri landsliðið og fyri HB. Líka síðani eg kom á landsliðið hevur hann verið ein fyrimynd og ein spælari, sum tú hevur sæð upp til, sigur Jónas Tór Næs um 36 ára gamla Fróða Benjaminsen.
Hóast Fróði er liðskipari á landsliðnum, so er tað ikki altíð at hann sigur so nógv., men tá hann langar nevan í borðið lurta menn.
Les eisini: Liðið so gott sum sett
Hann er stillur sum persónur, men hann kann eisini langa nevan í borðið og siga nøkur álvarsorð við menn. Ella koma við einni harratakling bæði í dysti og til venjing, sigur høgri bakkurin á landsliðnum.
Fróði er kendur sum ein harður spælari, ið ikki er bangin fyri at fara í tvídystirnar. Tað hevur millum annað fyrrverandi franski landsliðsmiðverjin, Willam Gallas fingið at kenna á sín egna kropp.
- Eg minnist væl, tá Fróði trekti tenninar úr William Gallas. Eg haldi hann gav honum albogan og fert tú at leita í alboganum hjá Fróða, so finnur tú eina tonn onkustaðni har. William Gallas bleiv púra svakur, greiðir Jónas frá í einum skemtiligum tóna.
- Eg gjørdi tað ikki við vilja, sigur Fróði Benjaminsen.
Jónas Tór Næs, Fróði Benjaminsen og føroyska landsliðið spæla fríggjakvøldið móti Grikkalandi í Athen. Dysturin byrjar klokkan 19.45 føroyska tíð.
