Gøtuljós sløkt í Havn

Hesa ársins tíð eru øll gøtu­ljós í Havn – uttan tey í mið­býnum og onkra aðra­staði – sløkt.
– Og soleiðis hevur verið í út við 40 ár, sigur Heðin Mortensen, borgarstjóri í Havn
Ljósini hava verið sløkt um hesa tíðina og fram til eina viku undan ólavsøku á hvørjum ári í útivið 40 ár. Av tí at henda tíðin er so ljós, hevur hetta ongatíð áður elvt til nakrar trupulleikar.
– Nú hevur kortini onk­ur givið ilt av sær hjá borg­arstjóranum. Gøtu­ljósdeildin hevu­r í hesum sambandi gjørt eitt yvirlit frá nýggju gøtu­ljósskipanini, sum komm­unan er við at menna. Her sæst, hvussu nógv gøtu­ljósini lýsa gjøgnum árið, sigur Heðin Mortensen.
Yvirlitið vísir millum ann­að, at í juni mánað eru ljósini sløkt, meðan tey í desember lýsa 530 tímar av teimum 744, sum eru í alt.
– Kvøldini eru ymisk, alt eftir um tað er klárt ella ádrigið, í gjár til dømis var serliga gott veður við ljósum veðri. Hjálagda mynd er tikin kl 23 í gjárkvøldið í Norðasta Horni og vísir greitt, hvussu ljóst tað var, sigur Heðin Mort­ensen.
Kommunan sløkkir ljósini fyri bæði at spara pening og orku og harvið eisini fyri at verja umhvørvið.
– Mett út frá vanligari sið­venju og teimum hagtølum, sum eru til taks, sær komm­unan onga orsøk til at broyta hesa 40 ára gomlu praksis, sigur borgarstjórin í Havn.