Hóast lagið ikki hevur verið so galið seinastu vikurnar, so er tað framvegis veruleikin, at KÍ er á øðrum niðurflytingar plássinum. Tað gekk væl í fyrra umfarinum móti EB/Streymi, men eftir steðgin vóru teir í KÍ ikki nóg ansnir, og so taptu teir móti væl uppløgdu EB/Streyma monnunum.
Nú sansar at hjá KÍ, sum illa kann liva við einki at fáa burturúr, tá ið teir í morgin fara til Gøtu at spæla.
Nógv fólk hevur í vikuni verið til venjingar í Klaksvík, og lagið sigst hava verið gott. Jan Joensen og Eyðun Klakstein, sum orsaka av skaða hava verið uttanfyri í nógvar vikur, hava vant, men tað verður ikki mett sannlíkt, at teir verða millum teir fyrstu ellivu. Eftir skaðan í Runavík hevur Niclas Niclassen verið skaddur. Nú hevur hann aftur verið og vant, men tað er ikki sannlíkt, at hann verður millum teir fyrstu ellivu í Gøtu.
Í Gøtu er Áslakur R. Petersen tøkur aftur, eftir at hann seinast var leikbannaður. Álopsspælarin Poul Arni Jacobsen fekk ein løst í Fuglafirði. Hann hevur ikki vant í vikuni, og tað varð í gjár ikki roknað serliga sannlíkt, at hann verður tøkur í morgin.
Krzystof Popczynski fekk gongd aftur á málskjótingina, tá ið hann sunnudagin í Fuglafirði eftir lítlari løtu skoraði tvær ferðir. Í Gøtu verður ásannað, at tað er ein av mest týndingarmiklu fyritreytunum fyri góðari úrtøku, at leikandi venjarin finnur vegin til meskarnar.
Síðsta vikuskifti lagaðu úrslitini seg serliga væl fyri GÍ, sum slapp heilt fitt burtur úr botninum. Í Gøtu rokna teir við, at tað fer at verða mest sum sloppið, um tað í morgin skuldi eydnast at fingið fulla úrtøku.
GÍ og KÍ hava dystast tvær ferðir fyrr í ár, og í báðum førunum hevur talan verið um fulla úrtøku hjá útiliðnum. Í triðja umfarinum vann KÍ 2-1 í Sarpigerði, og í 12. umfarinum vann GÍ 2-1 í Klaksvík.
