Fyri fyrstu ferð í søgu felagsins fer Víkingur at spæla landskappingardyst, og hvat man vera betur enn at byrja á heimavølli. Klokkan 18:00 fer fyrsti landskappingardysturin hjá Víkingi av bakkastokki, og er har talan um dyst móti B68.
Fortreytirnar
B68 vann sær í síðsta kappingarári luttøku til Formula fótbólt við at vinna 1. Deild heili 11 stig framman fyri nummar tvey, meðan tað hinvegin er eitt sindur ørðvísi hjá heimaliðnum. Víkingur er nýtt felag í Føroyum, og er tað úrslit av samanlegging av feløgunum GÍ og LÍF, ið ávíkavist spældu í Formula og 1. Deild í síðsta kappingarári. Í báðum førum var talan um eitt fimta pláss, og fekk GÍ 38 stig, meðan LÍF fekk 43 stig.
Tá hugsað verður um fortreytirnar, má man siga, at nýggja liðið Víkingur hevur ein lítlan favoritt status, hóast man als ikki skal avskriva nýliga uppfluttu B68.
Styrkur í báðum borðum
Á báðum liðunum í kvøld er talan um styrktir hópar, og millum annað hava bæði liðini leitað sær til Brasiliu. Víkingur tók enntá stigið til at fáa sær venjara úr Brasilia, men tá hesin ikki hevði neyðugu pappírini í lagi, varð hesin ikki førur fyri at røkja sítt starv, og noyddist av landinum aftur.
