Í morgin verður fyrsta skipaða uttandura vælveruøkið tikið í nýtslu á Glaðsheyggi í Havn.
Ætlanin gongur í stuttum út uppá at gera nøkur serlig og hugnalig spælipláss, har amboð verða sett upp, sum eru ætlað til rørslu og spæl. Endamálið er at fremja heilsugóðan livihátt við at fáa so mong sum møguligt at røra seg meira í gerandisdegnum, eins og at fyribyrgja vælferðarsjúkum.
Nøkur av hesum amboðum til rørslu- og strekkvenjingar eru serliga væl egnað til vaksin og eldri
Heðin Mortensen, borgarstjóri, sigur, at fyribils verða tvey øki sett av til rørsluamboð uttandura, og tey eru á Glaðsheyggi og á Trapputrøðni.
Í morgin, kl 16, verður økið á Glaðsheyggi alment tikið í nýtslu. Heðin Mortensen, borgarstjóri, bjóðar vælkomin, fimleikara og dansigentur fara at sýna fram, útgerðin verður roynd og køn fólk fara at vegleiða.
