Mattias H. Lamhauge vardi málið hjá FC Fredericia, sum seinnapartin spældi seinasta dystin í ovara endaspælinum í næstbestu donsku fótbóltsdeildini hetta kappingarárið.
Fredericia tapti á egnum leikvølli, Monjasa Park frammanfyri 1.400 áskoðarum 0-1 fyri Hobro. Frederik Christensen skoraði sigursmálið tá seks minuttir vóru leiktir av seinna hálvleiki. Sambært Fredericia Dagblad sá verjan hjá Fredericia ikki gott í støðuni sum førdi til sigursmálið hjá Hobro.
Sambært hagtølunum hevði Mattias seks bjargingar í dag.
Mattias hevur vart málið hjá Fredericia í 14 kappingardystum. Í trimum dystum hevur hann hildið málið reint, men hevur yvirhøvur fingið góð skoðsmál.
Fredericia endaði á einum fjórða plássi í ovara endaspælinum við 47 stigum, fýra stig aftanfyri lokalu arvafíggindirnar, Kolding.
Mattias kann nú hugsavna seg um uppgávurnar hjá føroyska landsliðnum í Baltic Cup, har Estland verður mótstøðuliðið í Talinn komandi leygardag klokkan 17. Komandi týsdag spæla Føroyar móti antin Litava ella Lettlandi.
