Seinnapartin spældu Óli Mittún og liðfelagarnir í GOG dyst á heimavølli í bestu donsku hondbóltsdeildini.
Á vitjan í Arena Svendborg høllini var Skjern. GOG var favorittur undan dystinum, og var GOG eisini á odda 14-11 í steðginum. Men tað lá ikki líka væl fyri hjá GOG í seinna hálvleiki, og endaði dysturin tí við 29-26 sigri til Skjern, ið er stórt vónbrot hjá heimafólkunum.
Óli hevði tó eitt gott avrik. Hann skoraði fýra mál, legði upp til fimm mál, og vann liðnum trý brotskøst. Sambært hagtølunum var Óli mest virðismikli leikarin hjá GOG.
Hósdagin klokkan 17.45 spælir GOG dyst á útivølli í bólki B í Champions League. Tá spæla teir móti pólska liðnum, Wisla Plock.
