Í kvøld verður konsert í Gjáargarði við luttakarum úr sangskrivaraskeiði, sum
amerikanarin Brett Perkins hevur hildið við Gjógv hesa vikuna. Á konsertini luttaka nøkur av teimum størstu nøvnunum innan sangskriving í Føroyum, umframt sangskrivarir úr Írlandi, Svøríki, USA og Danmark.
Roknast kann við eini forvitnisligari konsert, har kendir føroyskir sangskrivarir
royna nýggjar leiðir, og har útlendskir sangskrivarir vísa, á hvønn hátt uppihaldið
í Føroyum hevur givið teimum nýggjan íblástur.
Millum tey luttakandi á konsertini vera Vígdis Fjallstein, Jóan Petur á Stongunum,
Signar í Homrum, Eyðfinn Jensen, Marius, Parisch Browne (Írland), Bjorn Zetterqvist
(Svøríki), Annemarie Zimakoff (Danmark) og Brett Perkins (USA).
Brett Perkins skipar árliga fyri altjóða sangskrivaraskeiðum í Danmark, Svøríki,
Grikkalandi, Írlandi og USA, og ætlanin er, at hetta eisini skal vera eitt árligt
tiltak í Føroyum. Sangskrivaraskeiðið er fingið í lag í samstarvi við Tónleikur.fo
og Dansk Artistforbund.
Konsertin í Gjáargarði í kvøld byrjar kl. 20, og tað er ókeypis atgongd. Í
annaðkvøld verður eisini konsert við luttakarum frá sangskrivaraskeiðinum á Kafé
Kaspar í Havn.
Hesum boða fyrireikararnir frá í dag.
