Friðingarmyndugleikin gav longu tíðliga í heyst útbyggingarætlanunum fyribils grønt ljós, men í hoyringssvarunum til Umhvørvisstovuna, sum Sosialurin hevur fingið innlit í, sæst, at fleiri seta spurnartekin við árinskanningarnar, sum eru gjørdar.
Fornminnissavnið er serstakliga atfinningarsamt í sínum viðmerkingum, og metir, at árinskanningin als ikki er nøktandi. Ongar ljóðmálingar eru gjørdar av verandi havnaøki, og tískil er ikki gjørligt at meta um, hvussu ljóðdálkingin frá útbygda havnaøkinum verður, stendur í árinskanningini. Hetta halda bæði Fornminnissavnið og fleiri av hinum, ið hava sent Umhvørvisstovuni viðmerkingar, vera alt ov vánaligt.
Serliga Fornminnissavnið, men eisini aðrir viðmerkjarar, fílast eisini á, at so lítið er gjørt burtur úr at kanna aðrar møguligar staðsetingar til nýggja havn, og at tær viðmerkingar, sum eru gjørdar hesum viðvíkjandi, tykjast sera yvirfladiskar.
Fornminnissavnið, sum varðar av Skansanum peikar á, at árinsmetingin ikki hevur gjørt nakra meting av, hvussu ristingar kunnu hugsast at ávirka nærumhvørvi.
- Sagt verður, at konsekvensurin av vibratiónum verður “ubetydelig.” Hetta er helst út frá útsøgnini um at "generelt vil afstanden fra anlægsarbejdet til boliger være så store, at eventuelle vibrationer ikke vil være generende". Tað sýnist ikki sum mett er um vibratiónir í øki tættari við. Her skal viðmerkjast, at vollarnir kring Havnar skansa eru úr uppmúraðum náttúrsteini. Ein saknar sostatt eina meting av, hvønn skaða arbeiðið kann gera á vollarnar.
Niðurstøðan hjá Fornminnissavninum er hendan.
- Samanumtikið kann soleiðis sigast at útbyggingin vil blokera Skansan og økið yviri við Strond frá Nólsoyarfirði, at tað vilja vera týðandi vansar í sama øki í bæði anleggsfasuni og rakstrarfasuni, og at ætlanin sýnist stuttskygd. Mælt verður tí frá at loyva ætlaðu útbyggingini.
- Heldur eigur ein í álvara at umhugsa øðrvísi loysnir av eini nýggjari havn í miðstaðarøkinum. Góðir møguleikar skuldi verið fyri eini loysn, har Tórshavnar Havn og Tórshavnar kommuna annaðhvørt sjálvi ella í samstarvi við øðrum kommunum byggir eina góða nútíðar havn við góðum útbyggingarmøguleikum í einum øðrum øki í miðstaðarøkinum.
Lesið viðmerkingar frá fýra fyrrverandi borgarstjórum í Havnini og einum arkitekti í mánadagsblaðnum.
