Síðani vísir hann á sensatiónina í Fólkaflokkinum, Anniku Olsen.
Men úrslitið var altso soleiðis, at Fólkaflokkurin gjørdist fjórðstørstur ? ella fjórðminstur. Tríggir flokkar eru størri og tríggir eru minni.
Men sensatiónin Annika Olsen er ikki farin aftur við borðinum í miðlunum – heldur ikki áðrenn valið. Gitt hevur verið, at annaðhvørt hon ella Jacob Vestergaard fóru at liggja í front, og nógv hevur verið tosað um formansvalið komandi hjá Fólkaflokkinum.
Og tað er ikki av ongum, at miðlarnir hava slíkan áhuga fyri hesum formansvali. Tí tað eru nógv ár síðani, at so stórir spurningar hava verið settir við leiðslu floksins og við ymsar avgerðir, sum flokkurin hevur tikið.
Um valúrslitini hjá Fólkaflokkinum verða nærlisin, so sæst eitt nú, at flokkinum tørvaði 396 atkvøður at vinna seg fram um bæði Tjóðveldi og Javnaðarflokkin. Hyggja vit so at persónliga úrslitinum hjá formanninum, so fór hann úr 959 persónligum atkvøðum í 2007 niður á 343 atkvøður hesaferð. Hetta er ein munur upp á 616 atkvøður. Hevði Jørgen Niclasen hildið fast um sínar atkvøður, so hevði flokkurin verið næststørstur og hevði havt annað umboðið á danatingi – sum kundi neutraliserað ta reyðu yvirvágina, sum norðuratlantisku umboðini nú hava.
Tí hevur formansvalið í Fólkaflokkinum framvegis stóran áhuga.
