Eyðun Samuelsen skal nú manna altjóða dómarapar saman við íslendskum dómara.
Herfyri gjørdist tað greitt, at fremsta føroyska dómaraparið í hondbólti, Eyðun Samuelsen og Andreas F. Hansen, góvust at døma. Andreas hevur tikið við nýggjum avbjóðingum sum venjari, og tí hevur hann valt at gevast við dømingini. Samstundis boðaði Eyðun Samuelsen frá, at hann eisini gavst at døma.
Men nú er vend komin í – og tað er av heilt serligari orsøk. Íslendingar hava eisini mist ein altjóða dómara, og tí hava íslendingar og føroyingar tosa saman, og nú skulu Eyðun Samuelsen og Ingvar Guðjónsson manna eitt nýtt dómarapar.
- Eg hevði gjørt upp við meg sjálvan, at eg skuldi gevast at døma, tí eg og Andreas hava dømt so nógv saman, og nú hann valdi at gevast, hevði eg ikki hug at halda fram við nýggjum makkara. Men hendan nýggja støðan hevur broytt upp á tað, og nú eri eg sera spentur at fara undir at døma saman við íslendska dómaranum, sigur Eyðun Samuelsen.
Ísland hevur tey altjóða dómarapør, og nú tann eini dómarin gavst, kom ein dómari at mangla. Tað er ikki bara sum at siga tað, at fáa nýggjan dómara góðkendan til altjóða døming, og tí stóðu íslendingar til at missa annað altjóða parið. Í Føroyum var støðan tann sama, og eftir Kristian Johansen, formaður í Hondbóltssambandinum, hevði verið í Íslandi og var komin í prát við formannin í íslendska dómarafelagnum, avgjørdu teir at gera eina roynd at savna eitt føroyskt og íslenskt dómarapar, sum frá byrjan hevði altjóða góðkenning.
Europeiska hondbóltssamgongan EHF var ikki heit fyri hugskotinum at byrja við, men eftir samráðingar og mýkingar hevur EHF nú sagt gott fyri nýggja samstarvinum.
- Eg og Ingvar fara at døma dystir saman í íslendsku og føroysku kappingini av og á, og annars fara vit at halda fram við at døma hvør sær eisini. Tað merkir, at eg haldi fram við at døma her í Føroyum, men tað verður so við skiftandi makkarum, sigur Eyðun Samuelsen.
Dómaraparið, sum Ingvar Guðjónsson var helvtin, dømdi farna kappingarár fimm Champions League dystir, og tí eru vónir fyri, at Eyðun og Ingvar við tíðini kunnu fáa stórar altjóða uppgávur.
Hava teir hug, kunnu Eyðun Samuelsen og Ingvar Guðjónsson halda fram at døma í altjóða hondbólti í meira enn 10 ár. Aldursmarkið fyri dómarar er 50 ár, og bæði Eyðun og Ingvar eru síðst í 30’unum.
