##med2##
Í dag var Fótbóltspanelið aftur á FM1. Sendingin hevur ikki verið á ská síðani steðgur kom í alt samfelagið. Nú byrjar fótbóltur aftur og tað merkir eisini skránna hjá FM1.
Ein av gestunum í dag var Virgar Hvidbro, aðalskrivari í Fótbóltssambandinum. Hann greiddi frá tilgongdini við at fáa fótbóltin í gongd aftur. Í løtuni er tilmælið frá koronaráðgevingini at tað skal verða uttan áskoðarar. Tað ynskir Fótbóltssambandið eisini at fylgja, men avbjóðingin er um áskoðarar ikki fylgja tilmælinum.
- Eg kann bara mæla til vit og skil. Vit kunnu ikki fara at renna eftir fólki, um tey standa á einum bakka. Vit hava sagt, at tað skulu standa vaktir við inngongirnar, sum tað plagar. Har verður boðað frá, at bara tey á listanum sleppa inn, sigur Virgar Hvidbro.
Altjóða áhugi
Tað er eisini stórur altjóða áhugi fyri føroyskum fótbólti, sum er tann fyrsti, ið er farin í gongd aftur í Evropa eftir ein koronasteðg. Tað merkist eisini hjá veddingarfyritøkunum, sum leitar eftir dystum. Tað kann geva avbjóðingar tá talan er um avtalað spæl.
- Vit fara at tosa við spælararnar og minna teir á vandan. Ongin skal halda seg vera for góðan til at fella fyri freistingini, sigur Virgar Hvidbro.
In.fo og FM1 fylgja gongdini í 1. umfari, sum verður leygardagin.
