Mánakvøldið var lutakast um, hvussu tey átta liðini, sum eru eftir í kappingini um Løgmanssteypið, skulu spæla í fjórðingsfinalunum. Og ikki ber til at siga annað, enn at í øllum førum tríggir av teimum fýra dystunum kunnu gerast sera spennandi.
EB/Streymur, sum hesi seinnu árini hevur verið sterkasta steypaliðið í landinum, skal á útivølli spæla ímóti NSÍ, sum fyrr plagdi at koma langt, men seinnu árini ikki hevur yvirlivað fyrsta umfar. Fleiri vilja vera við, at EB/Streymur er besta liðið í løtuni, og so fæst at síggja, hvat NSÍ kann gera á heimavølli ímóti steypavinnarunum.
Ein annar áhugaverdur dystur er eisini eysturoyaruppgerðin millum Víking og B68, sum skal spælast í Gøtu. Víkingur vann steypakappingina fyri tveimum árum síðani og er ein lítil favorittur á heimavølli ímóti B68, sum ikki hevur nakað steyp á sínum avrikslista, men hinvegin sær út til at hava eitt spennandi lið í ár.
Opið í Vágum
Eisini man tað heila standa rímiliga opið í dystinum millum uppflytararnar, 07 Vestur og KÍ. Vágamenn vóru sannførandi í sínum steypadysti ímóti FC Suðuroy, meðan KÍ ikki gjørdi meira enn neyðugt fyri at vinna á Undrinum. Greitt er undir øllum umstøðum, at eitt av liðunum í hálvfinaluni verður ein uppflytari.
Fjórði dysturin er millum tapandi steypafinalistarnar í fjør, ÍF, og niðurflytararnar í bestu deildini, AB. Argjamenn eru einasta av fjórðingsfinaluliðunum, sum ikki spælir í Vodafonedeildini, so tí man lítið vera at ivast í, at ÍF skuldi verið greiður favorittur. ÍF kom í fjórðingsfinaluna við stórsigri á Skála, meðan AB bara akkurát knógvaði TB.
Fjórðingsfinalurnar verða spældar mikudagin 4. mai, og síðani verður nýtt lutakast um, hvussu vinnandi liðini skulu spæla í hálvfinalunum, sum verða hósdagin 19. mai og týsdagin 14. juni. Finalan um Løgmanssteypið verður spæld í Klaksvík fríggjadagin 5. august klokkan 18.
- - -
Løgmanssteypið:
Fjórðingsfinalur
4. mai Víkingur - B68
4. mai NSÍ - EB/Streymur
4. mai ÍF - AB
4. mai 07 Vestur - KÍ
Hálvfinalur
19. mai og 14. juni
Finala
5. august (í Klaksvík)
