Fiskaolja fyribyrgir æðrakálking

Fært tú eins nógvar omega-3 feittsýrur, sum ein miðal japanskur borgari fær, minkar vandin fyri æðra­kálking og hjartasjúkum mun­andi.
Tað vísir ein nýggj vísundalig kann­ing, sum tíðarritið Heart hev­ur kunngjørt.
Tilburðirnir av kálking í hjarta­pulsæðrini, sum føra til hjarta­sjúkur, eru munandi lægri mill­um japansk­ar borgarar enn mill­um fólk í øðrum ídnað­ar­sam­feløg­um, eitt nú USA.

Eta meira fisk
Gransking vísir, at munurin millum fólk í Japan og í øðrum ídn­að­ar­samfeløgum ikki er genetisk. Hin­vegin er hin mest sannlíka frá­grei­ð­ingin hon, at fólk í Japan fáa mun­andi fleiri omega-3-feittsýrur úr fiski.
Í miðal etur ein japanskur borg­ari út við 100 gram av fiski um dag­in, meðan talið fyri eitt nú ein amerikanskan borgara bert liggur mill­um 7 og 13 gram um dagin.
Ein granskingarbólkur, sum var mannaður við japanesarum og ameriku­monnum, hevur fylgt 175 japans­k­um og 113 amerikanskum monn­um í fimm ár. Her vórðu ymisk­ir vágafaktorar, sum kunnu føra til hjartasjúkur, kannaðir, eitt nú royking, høgt blóðtrýst og nøgd­in av sukur í blóðinum.

100 prosent størri
Kanningin vísir, at amerikansku menninir vóru í tríggjar ferðir so stórum vanda fyri kálking í hjarta­puls­æðrini sum japansku mennin­ir. Haraftrat var innihaldið av omega-3 feittsýrum í blóðinum meiri enn 100 prosent størri millum japans­ku menninar, sum vóru við í kann-ing­ini.
www.helse.dk skrivar, at best hevði sjálvsagt verið, um kanningin var enn meira umfatandi og hevði havt kvinnur við, soleiðis at granskararnir við størri vissu kun­du sagt, at úrslitið er galdandi fyri bæði kynini.
Fyribils ábendingarnar eru tó, at fólk í okkara parti av heiminum í størri mun eiga at eta fleiri lívs­neyð­ug­ar feittsýrur, enn vit gera í dag, og tað er at vóna, at granskað verður enn meiri á hesum øki.

Lívstýdningarmikið
Omega-3 feittsýrur eru lívsneyðugar eins og vitaminir. Tá likam okkara ikki kann framleiða hesar, skulu vit hava tær við matinum.
Feitur fiskur hevur meira av omega-3 enn fiskur sum er rak, men feit­ur fiskur er oftast eisini meira dálk­aður. Haraftrat kemur, at villur fisk­ur hevur fleiri omega-3 enn ald­u­r fiskur. Ein effektivur háttur at tryggja sær nóg mikið av feittsýrum er við fiska­olju, har tú kanst vera vísur í nøgd­ini av omega-3.
- Tú eigur at velja tær reinsaða og kontrolleraða fiskaolju, sum ikki er dálk­að við tungmetallum og klori er veg­leiðingin hjá www.helse.dk