Firvaldur snýtti favorittarnar

Tað var nógv, sum vendi øðrvísi, enn tað varð roknað við, tá ið 5-mannaførini við gentumanningum kappaðust í finaluróðrinum á Havnarvág.

Í FM kappingini var talan um finalu millum Silju úr Fuglafirði og Drekan hjá Havnar Róðrarfelag, sum undan róðrinum høvdu sama stigatal. Silja endaði frammanfyri Drekan, og harvið vóru tað genturnar í Fuglafirði, sum vunnu FM heitið.

Men tað vóru hvørki Silja ella Drekin, sum vóru við í kappingini um sigurin á ólavsøku. Silja endaði á fimta plássi, og Drekin varð nummar seks.

Hesa ferð var tað Firvaldur av Tvøroyri, sum var við fyri fyrstu ferð, ið var fyrstur á mál. Firvaldur var næstur Molanum, og størstu kappingini fekk hann frá gula Spógvanum av Glyvrum, sum lá næst Tinganesi. Á málinum var Firvaldur skutin undan Spógvanum.

Eitt lítið vet aftanfyri Spógvan var Fípan Fagra úr Klaksvík, sum harvið vann bronsu bæði í ólavsøkuróðrinum og í FM kappingini. Soleiðis sum gongdin var í dag, so varð tað heilt tætt í FM kappingini. Silja vann FM við 39 stigum, Drekin vann silvur við 38 stigum, og Fípan Fagra vann bronsu merkini við 37 stigum.