Liðítrótturin sum er finnum kærast er íshokki.
94 ár eru liðin síðani Finnland spældi sín fyrsta landsdyst í íshokki móti Svøríki á einari frystari tjørn í Helsinki. Tá tapti Finnland 1-8, men síðani tá hevur menningin bara gingið ein veg, og áhugin og undirtøkan fyri íshokki er risastórur í landinum við teimum túsundtals vøtnunum.
Klokkan seks í morgun finska tíð byrjaði olympiska finalan millum Finnland og russisku olympisku nevndina, ið russiska liðið má nevna seg fyribils.
Russar løgdu seg á odda í fyrstu periodu. Finnar javnaðu til 1-1 í aðru periodu, og tíðliga í triðu periodu skoraðu finnar sigursmálið.
I: 7.17 Mikhail Grigorenko (Nikita Nesterov, Nikita Gusev) pp. 1–0.
II: 23.28 Ville Pokka (Hannes Björninen, Atte Ohtamaa) 1–1.
III: 40.31 Hannes Björninen (Marko Anttila, Atte Ohtamaa) 2–1.
Aftaná 2-1 leiðslu-málið eydnaðist tað leyvunum (Lejoniit) at halda málið reint, og so kundi gleðisfagnaðurin brúsa, Finnland er olympiskur meistari í íshokki á fyrsta sinni nakrantíð.
Allastaðni kring Finnland verður OL-gullið í íshokki feira í stórum stíli.
Liðskiparin, Valtteri Filppula skrivar finska íshokkisøgu. Hann er fyrsti og einasti finnin, ið hevur vunnið bæði Stanley Cup (NHL) við Detroit Red Wings í 2008, og sum eisini hevur vunnið olympiskt gull.
Finnland vann olympiskt silvur í 1988 og í 2006, og olympiska bronsu í 1994, 1998, 2010 og í 2014.
Slovakia vann 4-0 á Svøríki í bronsudystinum. Svensku miðlarnir geva ilt av sær aftaná skrædlið fyri slovakum.