Alment bil-og motorsúkklutreff verður í Fuglafirði leygardagin 23. juni, og tað eru Fuglafjarðar Ellisakfør sum skipa fyri. Tiltakið, sum verður við Mentanarhúsið, er ætlað ellisakførum, serbilum og motorsúklum.
Fuglafjarðar Ellisakfør hava seks ár á baki og hava í dag 18 virknar limir, sum hittast hvørt mikukvøld í Gamla Timburhandli í Fuglafirði.
Í hølunum er pláss hjá limum at hava akførini standandi, og vera hesi javnan víst fram til áhugaði sum koma framvið.
- Hugskotið við tiltakinum leygardagin er at savna so nógvar bilentusiastar saman sum gjørligt, har fólk hava høvi at síggja ella vísa fram síni akfør.
Í samband við tiltakið, verður eisini skipað fyri rekkjukoyring av Kambsdali til Fuglafjarðar, har koyrt verður frá ítróttarhøllini á Kambsdali til parkeringsøkið við Mentanarhúsið í Fuglafirði.
Úr Fuglafirði verður sagt, at tey, sum vilja verða við, skulu møta við ítróttarhøllina á Kambsdali leygardagin klokkan 13.30. Mentanarhúsið fer at hava opið, og høvi verður at keypa sær kaffi og okkurt etandi.
- Tiltakið við Mentanarhúsið verður frá klokkan 14-17, og er okkurt at spyrja um í hesum sambandi, eru fólk vælkomin at seta seg í samband við Hans David Erling Joensen.
