Fleiri túsund Volvo bilar eru í vanda fyri at vera raktir av oljuleka. Stóri svenski bilframleiðarin hevur tí afturkallað 37.000 bilar í Svøríki og 2.300 í danska kongaríkinum. Tað er tí eisini stórur møguleiki fyri, at føroyskir Volvo-keyparar eru raktir av trupulleikanum.
Talan er um ein trupulleika við einari oljuslangu, sum kann leka, og av trygdaráðum verða bilarnir afturkallaðir.
Føroyski Volvo veitarin er P/F Wenzel, og fyritøkan hevur fingið somu boð sum donsku Volvo veitararnir í dag.
- Tey, sum hava bilar, ið eru raktir av hesum trupulleikanum fáa eitt bræv frá okkum, har vit innkallað teir á verkstað. Talan er ikki um beinleiðis afturkalling, men heldur fyribyrging, sigur Rúni Djurhuus, stjóri í P/F Wenzel.
Rúni Djurhuus sigur, at telduposturin um oljulekan akkurát er komin hendan seinnapartin, og tað verður kannað nærri beinanvegin. P/F Wenzel hava eina skipan, har tey skjótt kunnu finna útav, hvørjir bilar eru ávirkaðir.
Hesir dieselbilarnir frá 2015 og 2016 eru ávirkaðir, sambært Volvo Car Denmark A/S:
V40
V 40 Cross Country
S60
V60
V60 Cross Country
XC60
V70
XC70
S80
XC90
Á heimasíðuni hjá P/F Wenzel sæst, at hesir bilarnir standa til sølu í Føroyum: V40, S60, V60, XC90, XC60
