Fara aftur at ferðast við koronu-sproytum

Hesa ferð fara tey at koppseta fólk ymsa staðni í Norðoyggjum - og síðani í restini í landinum

Hesar næstu vikurnar fer eitt lið av heilsustarvsfólkið at ferðast kring landið at bjóða fólk at verða koppsett fyri koronu.

 

Tað hevur yvirhøvur gingið væl at koppseta føroyingar, men nú í eina tíð hava tað verið færri, sum hava latið seg koppseta. Tískil hevur Sjúkrahúsverkið, í samstarvi við kommunur, gjørt nakrar royndir at gera tað lættari hjá fólki at lata seg koppseta. Vitjað hevur verið í Runavík, á Giljanes og á útoyggj og royndirnar av hesum hava verið góðar.

 

Nú verður so hildið fram og lagt verður til brots í Norðoyggjum mánadagin og týsdagin og endamálið er at gera tað lagaligari hjá fólki at lata seg koppseta.

 

Byrjað verður nú mánakvøldið og týsdagin í Norðoyggjum, síðani verður vitjað á Sandoynni og seinni er ætlanin eisini at taka allar bygdirnar á Suðuroynni og í Norðstreymi, sigur Sjúkrahúsverkið í einum boðum í dag.

 

Mánadagin verður koppsett soleiðis:

 

Klokkan 19.30 beint eftir Dag og viku verður koppsett í skúlanum í Kunoy.

Klokkan 20.30 verður koppsett í bygdarhúsinum í Haraldsundi.

Klokkan 21.15 verður koppsett í Róðrarneystinum í Árnafirði.

 

Týsdagin verður koppsett soleiðis:

 

Klokkan 19.30, beint eftir Dag og viku, verður koppsett í skúlanum á Viðareiði.

Klokkan 21.00 er koppsetingartoymið í skúlanum á Fossanesi.

 

Sjúkrahúsverkið hevur sjúkrabil við, so tað er lættari hjá fólki at fylgja við, nær koppsetingarfólkini eru komin til bygdar og so er bara at møta upp at lata seg koppseta – ella bara at forvitnast og síggja, hvussu alt gongur fyri seg.