Tíðliga í desember - ella fyri hálvum øðrum mánaði síðan - segði Hans í Líðini, stjóri á Rock Trawldoors í Vági, at teir fóru at royna nýggjar trollemmar í royndartanganum í Hirtshals hin 16. januar.
Hann vísti á, at talan er um tvey heilt nýggj modell av lemmum - eitt flótitrolsmodell og eitt model, sum er ein víðari útbygging av Sea-Hunter-modellinum.
Í dag, nú vit skriva 16. januar, er tað ein ómetaliga fegin stjóri, sum letur við seg koma - og heldur fyri, at nakrir dagar í lívinum kennast meiri spennandi enn aðrir.
- Tá vit vaknaðu í morgun, stóð ein spennandi dagur fyri framman. Nú tað kvøldar, kunnu vit ikki vera meira nøgdir við tey fantastisku úrslit, sum vit fingu í royndartanganum í Hirtshals í dag.
Stjórin vísir á, at nógvar royndir umborð á trolara og ein kraftmikil vilji gav teimum eitt óvæntað gott úrslit í dag.
- Nú hava vit knappliga tvey bein meiri at standa á. Ein heilsan til allar trolaramenn, bæði viðskiftafólk og komandi viðskiftafólk. Hetta er ein góður dagur, sigur ein ovurfegin, Hans í Líðini, stjóri á Rock Trawldoors.
