Ferðasambandið til Suðuroyðar hevur verið sera óstøðugt síðstu dagarnar, nú avloysaraskipið hjá Smyrli, Galaxy, ikki hevur megnað at røkt farleiðina sum ætlað.
Í gjár vendi skipið aftur til Krambatanga. Í morgun sigldi skipið ikki, men fór ikki til Havnar í dag fyrr enn klokkan 15, har túrurin var langur, tí siglt varð vestanfyri. Túrurin í kvøld av Havnini varð avlýstur, og ætlandi verður siglt av Havnini í morgin tíðliga klokkan 06.00.
Suðuroyarportalurin gevur meira ella minni ilt av sær í kvøld í oddagrein, ið hevur heitið:
Suðuroyingar “fangaðir” og “snýttir”
Sagt verður millum annað:
Í øllum førum, so eru nógvir suðuroyingar og ikki minst nógv ferðafólk, sum ætlaðu at halda langt vikuskifti í Suðuroynni, “fangaði” í Havn og noyðast á hotel ella í gistingarhús, tí umborð á Galaxy, har fólk kunnu leiga kømur í kvøld, er alt longu fult.
Snýtt av tyrluni
Í dag komu eisini fleiri suðuroyingar heim við flogfari úr Danmark. Hesi vóru kunnaði um støðuna við Galaxy og fingu at vita tey í staðin sluppu við tyrluni. Ferðaseðlar vórðu eisini keyptir við tyrluni, men eftir at hava bíðað í fleiri tímar (tí tyrlan varð útkallað til neyðstøðu) og tyrlan endiliga kom aftur í Vága Floghavn, fingu tey at vita, at tyrlan hóast alt ikki fleyg, tí Galaxy var farin av Krambatanga.
Tey fingu at vita, at tey í staðin kundu sigla suður í kvøld og vórðu víst til bussar, sum ókeypis koyrdu tey til Havnar. Men Galaxy siglur, sum kunnugt, ikki av Havnini í kvøld. Og tey, sum høvdu keypt ferðaseðil við tyrluni til Suðuroy, hvørki sloppu til Suðuroyar ella fingu endurgjald fyri ferðaseðilin – og noyðast eisini í kvøld at keypa sær gisting í Havn.
Hetta skrivar suðuroyarportalurin í oddagrein.
