Um tað er fyri at vísa, at Jenis av Rana er tann stóri svíkjarin, at fakfeløgini hava sent út hesa 19 ára gomlu myndina, skulu vit ikki kunna siga. Men hetta vísir ein fyrrverandi fakfelagsleiðara, sum nú er størsti fíggindin hjá fakfelagsrørsluni.
So her er av sonnum vent í holuni. Jenis av Rana er ikki longur fakfelagsleiðari hjá ungum læknum. Nú er hann væl løntur kommunulækni, og sum løgtingsmaður í 17 ár, so hevur hann longu tryggjað sær eina fulla, feita tingmannaeftirløn upp á slakar 21.000 krónur um mánaðin restina av lívinum longu um eitt gott ár, tá hann fyllir 60 – umframt ta pensjón, hann hevur savnað sær sum lækni pluss fólkapensjón pluss samhaldsfasta.
Og so er ikki annað at gera, enn at gloyma alt um megafonir, mótmælisdreglar og rakstrarróp um at fáa fakfelagsfíggindaligar politikarar til hús.
Hatta var tann Jenis, sum vardi tey á niðastu rókunum. Nú hann situr á ovastu rók við búgvið borð hjá Jørgen Niclasen, sum nú hevur valdið í Føroyum, hevur pípan fingið annað ljóð.
Soleiðis kunnu fakfelagsleiðarar ganga aftur. Um enn í gráum kálvskinni...
