Tað eru uttan iva fleiri enn bretski forsætisráðharrin, David Cameron sum hava ynskt sær og kanska eisini hava fingið ta føroysku stjørnutroyggjuna í jólagávu (sí aðra grein).
Í stuttari samrøðu við bretska tíðarritið RadioTimes segði hann beinleiðis, at hann elskaði ta føroysku troyggjuna.
Eftir at vit bóru hesi tíðindi á Portalinum fyri løtu síðani, vendu vit okkum til Guðrun Rógvadóttir frá fyritøkuni Guðrun&Guðrun, sum selja hesar troyggjurnar.
Fyritøkan selur hesar serstøku troyggjurnar til viðskiftafólk kring allan heimin, umvegis nethandil teirra. Tí hevur ein eisini eina føling við, í hvønn heimspart troyggjurnar fara,
- Og her kunnu vit síggja, at rættiliga stórt tal av troyggjum fara til Onglands, upplýsir hon.
At sendirøðin Brotsgerðin er víst bæði í Danmark, Føroyum, Onglandi og í USA, fer uttan iva at gera sítt til, at enn størri eftirspurningur verður eftir hesi troyggjuni og møguliga øðrum vørum frá Guðrun&Guðrun.
- Hetta er góð reklama fyri okkum, verður staðfest.
