Avvarðandi mótmæla, at trý búfólk á einum sambýli verða tvangsflutt í hvør sítt heraðshorn
Tað eru bygnaðarbroytingar í almannaverkinum, sum eru orsøkin til, at trý búfólk á einum sambýli verða tvangsflutt í hvør sítt heraðshorn.
Tey fimm avvarðandi, Kristina Mortensen, Jóhanna Joensen, Sonja Overgaard, Tórun Poulsen, Herdis Hofgaard, siga soleiðis í mótmælinum:
» Vit avvarðandi at trimum búfólkum, sum skulu flytast ella sum longu eru tvangsflutt, umframt avvarðandi hjá teimum báðum, sum skulu vera búgvandi á adressuni, eru skelkað!
Tey trý fólkini, sum skulu flytast av adressuni, hava búð saman í minst 30 ár og hava trivist sera væl saman. Tey bæði, sum ikki skulu flyta, hava búð í íbúð í kjallaranum í eini 5 ár og fingið tænastur og sosialan felagsskap við tey trý fólkini í erva. Tey bæði hava eisini trivist avbera væl undir verandi skipan.
Men í vár var friðurin úti! Tí tá byrjaði hendan flytiprosessin. Leiðarin á sambýlinum byrjaði tá at tosa um flytingina uttan at kunna grundgeva fyri henni. Bara at fólkini fóru at fáa tað betri. Onki um hvussu tey fóru at fáa tað betri samanborið við verandi støðu.
Vit avvarðandi mótmæltu flytingini, tí vit meta, at tað er valdsmissnýtsla at tvangsflyta fólk, sum ynskja at búgva saman! Og vit hava mótmælt til denna dag. Um fólkini bara blivu flutt á aðra adressu, men saman, høvdu vit ikki havt nakað ímóti flytingini. Men NEI, tey skuldu trods den, flytast eftir høvdinum hjá leiðsluni á sambýlinum og trivnaðardeplinum. Starvsfólkini á sambýlinum eru samd við avvarðandi, at hendan flytingin er burtur úr vón og viti. Hetta er ein maktdemonstratión av format!
Hóast okkara greiðu mótmælir, so bleiv ein persónur fluttur fyri mánaðum síðani og tann flytingin hevur givið bakslag fyri viðkomandi.
Fyrr í vikuni bleiv næsta búfólkið flutt, uttan at avvarðandi og formelli verjin hjá viðkomandi fekk nakra fráboðan fyrrenn seint um kvøldið eftir at flytingin var farin fram.
Nú er tískil bert ein av teimum trimum eftir í miðhæddini í sambýlinum og vit stúra fyri at tað er bara ein spurningur um tíð nær leiðslan tvangsflytir hann!
Vit avvarðandi hava verið í sambandi við øll leiðsluløgini í Almannaverkinum uttan at tað hevur eydnast at steðga hesari kynisku framferðini. Vit meta, at Almannaverkið hevur prógvað sína ódugiligheit við at bróta bæði almennar og innanhýsis reglur fyri flyting av búfólki umframt grein 19 í ST-sáttmálanum, sum sigur at øll fólk hava rætt til sjálvi gera av hvar tey skulu búgva og hvørjum tey vilja búgva saman við!
Nú er bara landsstýriskvinnan, Annika Olsen, eftir. Okkara vón er, at landsstýriskvinnan kann steðga NEYÐTØKUNI av hesum forsvarsleysu menniskjum.«
Vegna búfólkini
Kristina Mortensen, Jóhanna Joensen, Sonja Overgaard, Tórun Poulsen, Herdis Hofgaard
---
(Myndin er tilvildarlig mynd av Sambýlinum í Pætursgøtu í Hoyvík)
