Tað var eingin spenningur, tá ið 10-mannaførini leygardagin róðu á Skálafjørðinum. Eysturoyingur smurdi Vestmenningin av. Á málinum var munurin meiri enn hálvonnur bátslongd.
Harvið eydnaðist tað Eysturoyingi so rudduliga at fáa sett tingini upp á pláss aftur, eftir at Vestmenningur fyri viku síðani á Sundalagsstevnu var fremstur. Fyrstu lítlu løtuna var javnt millum allar tríggjar bátarnar. So tók Hoyvíkingur at dragna, og stútt og støðugt stakk Eysturoyingur seg framum Vestmenning.
Vestmenningar gjørdu einar tvær atsóknir í royndum at bjóða gula bátinum av. Men Kappróðrarfelagið NSÍ ynskti ikki at vísa blíðsskap – í hvussu so er ikki úti á fjørðinum.
Síðani tað í 1973 varð farið undir FM kappróður í tí líki, sum tað nú verður kappast, hevur Eysturoyingur tríggjar ferðir vunnið á Eystanstevnu. Fyrsti sigurin var við nýggja bátinum í 1998. Sami bátur vann aftur í 2002, og nú vunnu teir í bátinum, sum Sámal Hansen smíðaði í fjør.
Hesa ferð róðu teir við Eysturoyingi 2000 metra málið á Skálafjørðinum skjótari, enn teir nakrantíð áður hava gjørt tað. Vinnaratíðin var 9.02.11. Fínu hagtølini á drekin.fo siga, at bara eina ferð áður hevur vinnaratíðin á Eystanstevnu verið betri enn so. Tað var í 1976, tá ið Skálabáturin vann í tíðini 8.53.30. Tann tíðin var altso 0.09.03 betri enn tíðin hjá Eysturoyingi hesa ferð.
Triði besta vinnaratíðin á Eystanstevnu var tann hjá Vágbingi í 1982. Ta ferðina var vinnaratíðin hjá Vágbingi 9.03.09 ella knappliga eitt sekund lakari enn tíðin hjá Eysturoyingi hesa ferð.
1 Eysturoyingur 09:02.11
2 Vestmenningur 09:05.22
3 Hoyvíkingur 09:16.09
Støðan
1 Eysturoyingur 20
2 Vestmenningur 19
3 Hoyvíkingur 15
