Endamálið hjá Sambandsflokkinum er at vinna bæði løgtingsvalið og fólkatingsvalið, sum verður í heyst.
Tað var boðskapurin á landsfundinum hjá Sambandsflokkinum í morgun.
Seinni í ár verður bæði fólkatingsval og løgtingsval, so tað er einki at ivast í, at teir ymsu flokkarnir fáa seg royndar.
Og tað er greitt, at fíggjarliga hevur Sambandsflokkurin í hvussu so er styrki til at føra eitt valstríð, sum munar.
Tá roknskapurin hjá flokkinum varð lagt fram í morgun, varð upplýst, at sambandsfólk hava einar 1,6 milliónir krónur at føra valstríð fyri í ár.
Akkurát, hvussu nógv skal brúkast upp á valstríðið, er ikki heilt greitt enn, men á landsfundinum í morgun varð staðfest, at Sambandsflokkurin er væl brynjaður at bjóða av í valstríðnum.
Og tað varð eisini boðað frá, at leiðslan og umsitingin í Sambandsflokkum eru longu farin at leggja valstríðið til rættis.
