Hergeir Nielsen, løgtingsmaður
Sambært lóg er tað landsstýrið, ið ásetur reglur um roknskaparhald landsins, og í kunngerð er harafturat ásett, at allir stovnar hava skyldu til at nýta BL.
Kortini kann fíggjar- og búskapardeildin eftir umsókn loyva stovnum við serligum tørvi at nýta aðrar búskaparskipanir.
Soleiðis sum lóg og kunngerð eru orðaðar, kann eingin stovnur uttan loyvi frammanundan loyva sær ein túr inn í nethandlarnar at keypa sær sínar egnu skipanir.
Vit, sum eygleiða støðuna, ansa eftir, at ein almennur stovnur heldur seg hava serligan tørv á serligari skipan, og vit vita, at um so skal vera, so skal hann hava serligt loyvi frá landsstýrismanninum í fíggjarmálum til endaálið.
Hesin landsstýrismaður segði seg undir orðaskiftinum ikki at hava givið hetta loyvið.
Rætta viðkomandi í Tinganesi fingu vit ikki orðið á undir vigerðini av landsroknskapinum, men kanska tað eyðnast í øðrum umfari, nú tað brimar upp í klettin undir landsstýrismanninum í Vinnumálum.
Onsdagin 7. februar kálvar Sosialurin í oddagrein eina niðurstøðu um, at BL er ótíðarhóskandi og óbrúkilig, og ikki sæst blaðið hava tosað, hvørki við Fíggjarmálaráðið ella Gjaldstovuna, sum bera ábyrgdina av skipanini.
Hvørji samfeld áhugamál Sosialurin og Vinnumálaráðið hava í at dylja týdningarmiklar upplýsingar í dagførdum roknskapum, felags kontoskipanum, játtanar- og roknskaparreglum, KT-trygd, gjaldføri og gjøgnumskygni, ja, tað vita vit ikki.
Talan er um at skulka sær undan sjálvari stýringini av fíggjarkervinum, sum tey kønu halda vera eitt av allar størstu frambrotunum hjá føroyskari fyrisiting hesi seinastu 10 árini, ið skipanin er ment til almikið gang fyri landbúskapin.
Her eru vit so inni við kjarnuna í málinum, tí eingin almennur stovnur hevur loyvið til at fáa sær aðra skipan, fyrrenn loyvið til tess er givið av fíggjarmálaráðnum.
Landsstýrismaðurin í fíggjarmálum, Bárður Nielsen, fær tí henda munnliga fyrispurning í tinginum, onsdagin 21. februar 2007.
“Heldur landsstýrismaðurin, at keypið av Navision skipanini er fevnt av § 4, stk.5 í kunngerð nr. 114 frá 22. august 1996,um roknskaparverk landsins, og er skipanin eitt neyðugt forskoyti til Búskaparskipan Landsins?”
Roknað verður við, at landsstýrismaðurin kunnar løgtingið neyvari um ta støðu, sum er íkomin, síðan ein ella fleiri almennir stovnar eru farnir at brúka aðrar skipanir enn Búskaparskipan Lands-ins.
Nær er umsókn um Navision skipanina komin fíggjarmálaráðnum í hendi, er hon játta av Ráðnum, og nær er hon sett í verk?
Hvussu stórur er keypskostnaðurin fyri hesa skipan, hvussu stór er nýtslan higartil, og hvat kostar skipanin restina av fíggjarárinum?
Finst eitt líknandi modul í Búskaparskipan Landsins, sum kundi verið brúkt í staðin?
