– Enn er tíanverri langt á mál, til endamálið hjá felagnum er rokkið: At allir føroyingar, sum ynskja tað, hava møguleika fyri at búgva í Føroyum.
Soleiðis siga tey úr áhugafelagnum Búgva, nú tað fyrradagin vóru trý ár síðani, at felagið varð sett á stovn.
Búgva er sprottið úr Facebook-kjakbólkinum ”Fjølbroyttari bústaðarmøguleikar í Føroyum”.
Bólkurin, sum hevur trý ár á baki, telur fleiri enn 3000 limir, og er størsti kjakbólkurin, ið hevur til endamáls at viðgera ovurhonds stóru bústaðartrupulleikarnar í Føroyum.
Í sambandi við trý áradag vísir áhugafelagið á tað sama, sum víst varð á fyri trimum árum síðani, tá felagið varð stovnað:
– Nú er nóg mikið! Fólk í Føroyum hava tosað um bústaðartrupulleikar í eina hálva øld, og sera lítið er komið av skafti. Tí má okkurt henda NÚ.
– Búgva ynskir nógv meira kjak um, hví einki verður bygt, tá tørvurin er so ómetaliga stórur. Ung, gomul, støk, og pør - við ella uttan børn - greiða dagliga frá um trupulleikar við at finna okkurt at búgva í. Tí skulu fleiri bústaðir byggjast!
Búgva vil hava svar upp á hesar spurningarnar:
• Hví byggja fakfeløgini ikki bústaðir?
• Hví lata kommunurnar ikki bústaðir byggja?
• Hví syrgir landið ikki fyri bústøðum til okkum øll?
• Hví gera tryggingarfeløgini ikki íløgur í bústaðarbygging?
• Hví vísa bankarnir ikki samfelagssinni?
• Hví byggja Bústaðir ikki fleiri búðeindir, sum øll hava ráð til?
