Thomsen
Elsa er vaksin upp á Orgelbyggervej 8 Bispebjerg í Keypmannahavn. Foreldrini vóru Greta og Henrik Thomsen. Mamman var ektaður Københavnari og pápin var ektaður Sønderjyde, sum kom úr hugnaligu landsbygdini Jels. Tá pápi Elsu var føddur fyri 100 árum síðani, hoyrdi hesin parturin av Jyllandi undir Týskland.
Henrik flutti til Keypmannahavnar, har hann møtti gentuni Gretu, sum hann seinni giftist við. Tey vórðu 12 systkin, sum vuksu upp saman. Elsa er tann sjeynda í røðini. Mamman og pápin komu í brøðrasamkomuna í Tórsgøtu 40 á Nørrebro, har eisini nógvir føroyingar komu. Elsa kom tí, saman við sínum 11 systkjum, at ganga í sunnudagsskúla í hesi samkomuni, har hon eisini sum 12 ára gomul kom til persónliga trúgv á Jesus, meðan hon sæt undir liðini á mammu síni undir einum evangeliskum møti.
Elsa fekk burðardyggan førning við sær út í lívi, bæði frá samkomuni og frá barnaheiminum, sum seinni kom at roynast sum javnvágin í lívi hennara, tá hon sum ung mamma mátti ígøgnum harða lívsroynd.
Elsa ætlaði sær at gerast sjúkrasystir, sum hon eisini tók atgonguroynd til, men soleiðis skuldi tað ikki verða. Elsa hevði verðið sjúkrasystirin í orðsins fullu merking – systurin hjá teim sjúku og veiku!
Hansen
Ímillum føroyingarnar, sum komu í samkomuna í Tórsgøtu, var Fuglfirðingurin, Brynleif Hansen, sum var komin til Keypmannahavnar at læra til fjarritara. Har møttust Elsa og Brynleif, og tey giftust í 1961. Tey fingu fýra børn: Billy, Filip, Miriam og Anitu. Billy býr í Jyllandi, ikki langt frá Randers. Filip býr í Rio De Janeiro í Brazil. Miriam býr í Runavík og Anita býr á Toftum. Inntil nú hava tey givið Elsu 14 ommubørn.
Brynleif valdi sær ikki eina lívsleið sum fjarritari, men kendi kall at fara út í Harrans tænastu burturav. Elsa og Brynleif byrjaðu sína tænastu millum føroyingar og danskarar í Keypmannahavn, samstundis sum tey búðu í eini íbúð, sum lá næst til samkomuhølini í Tórsgøtu. Men Brynleif kendi eitt sterkt kall at byrja barnaarbeiði og barnalegur í Føroyum. Her átti hann ein dyggan stuðul í Elsu, sum, bert 23 ára gomul, stóð undir liðini á manni sínum, tá tey lýstu til fyrstu summarleguna við Áir í 1965.
Brynleif stóð fyri andaligu føðini, meðan Elsa syrgdi fyri likamligu føðini til tey mongu legubørnini. Elsa sigur mangan, “at vóru tað ikki tey mongu, bæði menn og kvinnur, sum komu at hjálpa teimum við Áir, so høvdu tey ikki verið komin ígjøgnum, tí slíkt arbeiði kann ein ikki gera einsamallur.”
Á sumri í 1967 fluttu legurnar til nýggju leguhúsini í Vatnsoyrum, og í ár eru 45 ár síðani Zarepta varð tikið í brúk. Zarepta liggur nær hjartanum hjá Elsu, og hon gleðist yvir øll tey, sum igjøgnum hesi mongu árini hava tikið ábyrgd í Zarepta.
Um ársskiftið 1968-69 fluttu Elsa og Brynleif inn í nýbygd hús í grannalagnum hjá Zarepta, men longu hálvtannað ár seinni, leygardagin 26. september 1970, legðist myrkur yvir heimið í Vatnsoyrum, tá Brynelif var millum tey, sum lótu lív í flogvanlukkuni undir Knúki í Mikinesi. Tá stóð andaligi førningurin, sum Elsa hevði fingið í sínum barndómsheimi og í sunnudagsskúlanum, sína roynd - hon søkti Harran og skriftirnar, har hon fann troyst og styrki bæði til sín sjálvs og til hennara fýra smáu børn.
Nakað seinni fekk Elsa spurningin, um hon umhugsaði at flyta aftur til Danmarkar, nú maðurin ikki var meiri. Elsa umhugsaði aldri at fara aftur til Danmarkar at búgva, tí hon kendi, at Zarepta átti ein so stóran part av henni. Elsa hevur búð í Føroyum í 47 ár, og hevur megnað at gera seg til eitt við føroyingar bæði málsliga og mentunarliga.
Djurhuus
Tað rann saman millum Elsu og Poul Jóhan Djurhuus trý ár seinni. 30 juni í 1973, ein heitan summardag á ráðhúsinum í Gladsaxe, vórðu tey vígd, og brúdleypsveitslan varð hildin saman við 44 gestum í snotuligu hølunum hjá KFUK í Store Kanningstræde 19 í Keypmannahavn.
Elsa og Poul Jóhan hava verið gift í 39 ár. Tey fingu børnini Andrew og Hervør Sabina, sum bæði búgva í Føroyum og hava familju. Fyrstu 10 árini búðu Elsa og Poul Jóhan í Vatnsoyrum. Á vári í 1983 fluttu tey til Glyvrar, har tey hava búð í 29 ár. Seinastu 22 árini hava tey virkað sum trúboðarar innan brøðrasamkomuna í Føroyum.
Í tíðarskeiðinum 1990 – 1995 vóru tey fyristøðuhjún í Kristnastovu saman við Susan og Øssuri Berghamar, og seinastu 9 árini hava tey, 4 mánaðir í vetrahálvuni, loyst av sum fyrstøðuhjún á Malta í Hirtshals. Tey eiga í dag 19 ommu- og abbabørn, og langabørnini eru tvey.
ELSE
Else hevur aldri verið kend sum frk. Thomsen, frú Hansen ella frú Djurhuus, men sum ELSE – vores allesammen Else.
Á enskum merkir “else” onnur. Vit, sum kenna teg, vita hvussu nógv tú livir fyri onnur, ikki bert í familjuni, men so sanniliga eisini uttanfyri familjuna. Tí kunnu vit á enskum siga um teg: “Your name is truly ELSE, because you live for everybody ELSE!”
Else ynskir at halda dagin saman við familju, vinum og kenningum leygardagin 6. oktober í Berøa í Saltangará. Har verður opið hús frá kl.10.00 til kl.14.00
Elsa sigur, at øll eru hjartaliga vælkomin, og at tað er eingin tilmelding.
Tillukku við degnum, góða, og takk fyri alt tað, sum tú hevur verið fyri so mong!
