Klokkan 21.46 fekk sløkkiliðið í Havn eina fráboðan um ein eldsbruna í Hornabø. Eldur varð kyknaður í einum húsum við J. C. Svabosgøtu. Fólk býr í húsunum og tað vóru tey sjálvi, ið boðaðu sløkkiliðnum frá eldinum.
Sløkkiliðið var á staðnum fimm minuttir seinni og kundi tá staðfesta, at talan var um ein eldsbruna í einum rúmi í kjallaranum.
Av sløkkiliðsstøðini verður sagt, at tað gekk væl at sløkkja eldin, og at teir fingu tamarhald á støðuni beinanvegin.
Nógvur roykur hevur staðist av eldinum, men væntandi er eingin stórvegis skaði komin á húsini.
Enn er ikki vist, hví eldurin kyknaði, men ein møguleiki er, at talan er um eitt skammlop, av tí at eldurin einans var í hesum eina rúminum.
Eingin kom til skaða í eldsbrunanum og maður í húsinum varð longu komin út, tá sløkkiliðið kom á staðið.
