Verður Roykilógin hjá Landsstýrinum samtykt, sum hon nú er orðað, verður tað eitt bakkast fyri Norrønu, sigur Smyril Line
Roykilógin, sum Landsstýrið hevur lagt fyri Løgtingið, er kappingaravlagandi.
Tað heldur Smyril Line.
Smyrl Line sigur, at sum lógin nú er orðað, fer hon at geva kappingarneytunum hjá Smyril Line fyrimun og tí verður hon eitt bakkast fyri flaggskipið í føroyskari ferðavinnu.
Jákup Sverri Kass á Smyril Line dylir ikki fyri, at Norrøna hevur inntøku av at selja tubbak og at lýsa við tubbakki í tollfríu faldaranum.
Men eftir nýggju roykilógini verður ikki loyvt at lýsa við tubbakki og tað verður heldur ikki loyvt at selja tubbakk í sjálvtøkuhandlum.
Heldur ikki kunnu tubbaksvørur liggja sjónligar frammi, men skulu fjalast.
Men í hesum føri eru flogferðslan undantikin, tí umborð á flogførum ber partvís til at lýsa við tubbakki, men ongi undantøk er fyri sjóvegis ferðafólkaflutning.
Smyril Line ger nú vart við, at eftir teirra tykki ger hetta roykilógina ógvuliga kappingaravlagandi.
- Vit eru í harðari kapping við onnur reiðarí, sum nú fáa betri sømdir enn vit og tað er eitt bakkast, sigur Jákup Sverri Kass.
- Verður hetta sett í verk, fáa vit hvørki selt ella lýst við tubbaksvørum umborð Norrønu og tað er kappingaravlagandi.
Hann sigur, at umframt at sigla til og úr Føroyum, siglur Norrøna eisini ímillum Noreg og Danmark og har eru tey í harðari kapping, men hetta kann gera støðuna hjá Smyril Line nógv veikari.
Hann metir heldur ikki, at hetta er í samsvari við ætlanina um at lokka fleiri skip upp í føroysku altjóða skipaskrásetingina, tí nú fáa tey verri treytir her enn aðrastaðni.
Annars ger Jákup Sverri Kass vart við, at Smyril Line tekur undir við andanum í lógaruppskotinum um at tryggja almenninginum roykfrítt umhvørvi.
