Tað seinasta nýggja er, at Ronald F. Poulsen, sum hevur umboðað Sjálvstýrisflokkin í Tórshavnar býráð í meira enn 16 ár, nú stillar upp fyri Sambandsflokkin. Síggja vit burtur frá Heina Olsen, sum eitt skifti í 1973 umboðaði Sjálvstýrisflokkin í býráðnum í Havn, so hevur eingin annar núlivandi persónur umboðað flokkin í býráðnum, síðani Ronald F. Poulsen tók við sætinum, tá Ebbe Mortensen doyði í 1980.
Á seinasta býráðsvalið í Havn fekk flokkurin 539 atkvøður. Av teimum fekk Sigrun Mohr tær 314. Men hon er á listanum hjá Javnaðarflokkinum hesaferð. Heðin D. Poulsen, sum var næstur við 175 atkvøðum tykist eisini vera rýmdur úr flokkinum. Hini bæði á listanum fingu tilsamans 42 atkvøður.
Fyrrverandi formaðurin Sámal Petur í Grund er farin til Framsókn, og fyrrverandi forkvinnan Helena Dam á Neystabø er farin til Javnaðarflokkin.
Meðan flokkurin tykist liggja væl fyri í Klaksvík við varaborgarstjóranum, so eru útlitini fyri at fáa umboð valt í Havn verri enn á teimum trimum seinastu valunum, har flokkurin ikki megnaði at koma upp um gáttina sum er 7,7 prosent ella 786 atkvøður við seinasta val. Á løgtingsvalinum í fjør fekk flokkurin 3,6% av atkvøðunum í Havn.
Sjálvstýrisflokkurin hevur í øllum førum skapt ta siðvenju, at tann, sum fær flestar atkvøður á Sjálvstýrislistanum í Havn rýmir til annan flokk:
– Í 2008 fekk Sigrun Mohr flestar atkvøður, 314. Hon rýmdi til Javnaðarflokkin.
– Í 2004 fekk Ingeborg Godtfred flestar atkvøður, 204. Hon rýmdi til Tjóðveldi
– Í 2000 fekk Ronald F. Poulsen flestar atkvøður, 121. Og hann rýmdi til Sambandsflokkin.
