Fiskivinna
Eini trý skp lógu við Kósabrúnna, tá vit vitjaðu fram við bryggjuni í morgin. Tey vóru partrolararnir Smaragd og Safir, sum landaðu í gjár. Skipini høvdu 126.000 pund tilsamans, meginparturin upsi.
Mánadagin landaðu línuskipini Polarstjørnan og Grani, sum bæði høvdu verið undir Íslandi. Polarstjørnan hevði 100.000 pund og Grani 150.000 pund.
Í morgin kemur línuskipið Klakkur undan Íslandi. Teir hava eini 150.000 pund á umleið 10 setum.
Veiðan hjá línuskipunum undir Íslandi er blandað. Býta vit hana upp í triðingar, er talan serliga um brosmu, longu og hýsu. Lítil toskur er uppi í veiðini hjá føroysku línuskipunum undir Íslandi í løtuni.
Í morgin landa eisini tveir trolbátar í Klaksvík. Fiskaklettur hevur eini 25.000 pund, men óvist var, hvussu nógv Varðin hevur inni.
Pól Fuglø, landingarformaður á Landingarmiðstøðini í Klaksvík, sigur, at umborð á Varðanum søgdu teir honum, at fiskiskapurin hendan túrin hevur verið brúkiligur um náttina, men lutfalsliga minni hevur verið at fingið í dagsljósi.
- Eg spurdi tó ikki, hvussu nógv teir høvdu inni, nú teir koma inn at landa í morgin, men eg vænti, at Fiskaklettur hevur eini 25.000 pund, sigur hann.
Slakur útróður
Tað hevur verið heldur smáligt við útróðri í Klaksvík seinastu dagarnar. Streymurin hevur verið harður, og lítil roynd hevur verið. Nú er streymurin linkaður aftur, veðrið er gott, og bátar í Klaksvík hava aftur verið á útróðri í nátt.
- Eg haldi ikki, at útróðurin hevur vignast nakað serligt hjá bátunum higartil í heyst, men vónandi verður betur, tá ið líður longur út á heystið og veturin, sigur Pól Fuglø.
Landingarformaðurin heldur, at bátarnir sum heild hava ligið niðanfyri 100 pund á stampin.
- Seinnu árini hava útróðrarbátarnir fingið nógvan fisk, mest sum alt árið, men í fjør byrjaði fiskiskapurin at minka – og í ár hevur útróðurin sum heild eisini verið slakari enn tey góðu undanfarnu árini.
Pól Fuglø sigur, at hampiliga støðugt arbeiði hevur verið á Landingarmiðstøðini.
- Ikki nakað rokasligt, men her hevur verið fitt at gera í løtum, sigur hann.
