- Hetta er rættiliga vandamikið fyri føroyska samfelagið. Tað sigur Óluva í Gong, forkvinna í Felagnum føroyskir sjúkrarøktarfrøðingar.
Sum vit lósu á in.fo í áðni, rýma føroyskir sjúkrarøktarfrøðingar í stórum tali uttanlands at arbeiða, ikki minst til Noregs. Men hóast hon heldur, at hetta er ”ræðuliga vandamikil” gongd fyri føroyska samfelagið, heldur hon samstundis, at hetta er ein trupulleiki, eingin hevur gáað um.
Í øllum førum er hetta ein trupulleiki, eingin tosar um og eingin hugsar um at gera nakað við. - Sum samfelag kunnu vit ikki vera tey fáu fólkini vit hava við serútbúgving, fyriuttan, sigur Óluva í Gong. Hon sigur, at fyri ein stóran part eru tað eisini sjúkrarøktarfrøðingar við serútbúgving, sum fara uttanlands.
Les eisini: Rýma úr Føroyum at arbeiða fyri dupulta løn
- Avleiðingin verður, at um fá ár hava vit ov lítið av serútbúnum sjúkrarøktarfrøðingum til at manna tey størvini, sum eru í Føroyum. - Talan kann vera um sjúkrarøktarfrøðingar við serútbúgving í narkosu, dialýsu, ella hvat tað skal vera. - Tað er ein trupulleiki vit merkja longu nú, at tað er torført at manna størvini í feriutíð, men tann trupulleikin fer bara at versna sum frálíður.
- Sum er, hava vit hava longu ov fáar sjúkrarøktarfrøðingar við serútbúgving í Føroyum. So samfelagið tolir als ikki, at vit missa teir fáu, vit hava, sigur forkvinnan í Felagnum Føroyskir Sjúkrarøktarfrøðingar.
Óluva í Gong vísir samstundis á, at miðalaldurin á sjúkrarøktarfrøðingum í Føroyum er yvir 47 ár í dag. - Tað er alt, alt ov høgt, staðfestir hon Samstundis missa vit burtur av teimum nýútbúnu sjúkrarøktarfrøðingum, so tær eldast alsamt.
Hon sigur, at ein orsøk til at so nógvar fara uttanlands at arbeiða er partvís, at lønin er so nógv hægri uttanlands. Men ein orsøk er eisini, at tað er ógvuliga ringt at fáa fast starv í Føroyum.
Harafturat útbúgva vit alt ov fáar sjúkrarøktarfrøðingar. - Seinast fingu 17 sjúkrarøktarfrøðingar prógv í Føroyum, samstundis sum útvið 40 lærarar og 40 pedagogar fingu starv. Sostatt útbúgva vit als ikki nóg nógvar búskaparfrøðingar, staðfestir hon. Men av teimum 17 sjúkrarøktarfrøðingunum, sum fingu prógv, hevur eingin fingið fast starv í Føroyum, sigur Óluva í Gong.
Hon sigur, at skulu vit framtíðartryggjað samfelagið á hesum øki, verður neyðugt við eini munandi lønarhækking í allarnærmastu framtíð. - Annars dugi eg ikki at síggja, hvussu heilsuverkið í Føroyum skal klára seg í framtíðini, sigur Óluva í Gong.
- Hetta rakar vanliga føroyingin ótrúliga hart og skulu vit hava eitt heilsuverk á sama stigi sum í hinum norðanlondunum, má nakað munagott henda við lønini í allarnærmastu framtíð, leggur hon afturat.
|
