- Ongantíð áður hevur skattainntøkan verið so høg, ongantíð áður hevur raksturin verið so høgur. Hugalig og kveikjandi hugskot og vilji skorta ikki fyri at føra býin fram á leið. Møguleikarnir eru stórir í býnum og framtíðin bjørt. Soleiðis byrjar Fólkaflokkurin í Klaksvíkar býráð eitt lesarabræv í dag.
Flokkurin fegnast um góðu gongdina í Klaksvík og leggur dent á, at flokkurin á flest øllum økjum tekur undir við meirilutanum, men, skriva tey, nýggja kósin við at hækka skattaprosentið er ein vandaleið.
- Vit ynskja at kommunan varðveitir kappingarførið, og at náttúrligi vøksturin og gongdin, kommunan hevur verið í seinastu árini heldur fram.
Flokkurin fegnast um tey stig, sum Klaksvíkar býrað í inniverandi árið hevur tikið, fyri at betra um korini hjá borgarunum, og serliga barnafamiljunum. Sum dømi verða nevnd at skattaprosentið varð lækkað, systkinaavslátturin styrktur, gjøldini til barnaansing lækkað og barnafrádráttin hækkaður.
Fólkaflokkurin heitir tí á meirilutan í Klaksvíkar býráð, um at finna fíggingina, sum krevst, aðrastaðni, heldur enn at økja um byrðina á borgaran og á vinnuna.
- Tað er als einki, ið talar fyri, at kommunan er í einari støðu, at okkum tørvar skattahækking, tvørturímóti. Klaksvíkar kommuna er ikki kappingarfør í skattapolitikki. Tær kommunur, ið vit samanbera okkum við, hava munandi lægri skattaprosent.
Les lesarabrævið her
