Fyrrapartin í dag kom danska skúlaskipið Georg Stage á Havnina. Sagt verður, at fyrsta skip við navninum varð sjósett longu í 1882. Hetta skipið sigldi fram til 1934, tá núverandi skip, sum sæst á viðheftu mynd, varð bygt.
Georg Stage er ein trímastraður fullriggari, sum tað verður rópt á skipsmáli. Hetta er eitt skip við seglum á øllum mastrum, sum øll eru fullriggaði. Skipið er ein sjómansskúli, viðurkendur av altjóða Sjóferðslufelagsskapinum IMO (International Maritime Organisation).
Útbúgvingin, sum næmingar kunnu fáa umborð, lýkur altjóða krøv á grundstigi og er undir eftirliti av danska Útbúgvingar-og Granskingarmálaráðnum. Sum næmingur umborð kanst tú eftir siglingstíðina antin fáa eitt arbeiði – ella lesa víðari.
- Nøkur gerast matrósar, men tað krevur uppaftur 20 vikur á skeiði umframt 12-18 mánaðir siglingstíð. Onnur gerast yvirmenn á brúnni. Tað tekur longri tíð, men gevur tær eisini fleiri møguleikar.
Á heimasíðuni hjá skipinum verður lagt aftrat, at uppaftur onnur kunnu gerast maskinmeistarar, um tey antin hava ella kunnu taka neyðugu eyka lærugreinarnar, sum skulu til.
Sum næmingur umborð á Georg Stage fært tú í øllum førum eina vitan um sjómansskap, arbeiðsgleði og virðir í arbeiðnum, sum kunnu gagna tær – líkamikið, hvar tú ynskir at arbeiða ella útbúgva teg eftir tíðina umborð.
Georg Stage er 177 føtur long. Sambært kunning um skipið, telur manningin tilsamans 73, harav 63 næmingar. Mastrahæddin er 31 metrar og skipið, sum er bygt úr stáli, er bygt á Frederikshavns Værft og Flydedok A/S.
