Runavíkar havn hevði aftur eitt gott ár í fjør.
- Bruttoinntøkan setti aftur met, og nettovinningurin var góðar 9 miljónir krónur. At hesin er nakað lakari enn í 2021, kemst eitt nú av, at nógvar umvælingar eru gjørdar á gøgnini, sum Havnarskrivstovan brúkar og umsitir fyri Runavíkar kommunu.
Í Runavíkar kommunu vísa tey á, at ein inntøka, sum hvarv við heimsfarsóttini covid-19 og hevur havt ilt við at koma fyri seg aftur, er siglingin við ferðamannaskipum.
- Gongd er nú við at koma á hesa bransjuna aftur, og eftir at umboð fyri Runavíkar havn fyri kortum hava verið á árligu ráðstevnuni hesum viðvíkjandi í USA, kann staðfestast, at vit fáa vitjanir av 15 ferðamannaskipum í ár.
Sagt verður, at higartil hava 15 ferðamannaskip heitt á havnina um keipláss í 2024.
Á heimasíðuni hjá Runavíkar kommunu - www.runavik.fo - verður víst til stabbamynd, sum sýnir gongdina eftir kommunusamanleggingarnar í 0-unum, og á aðrari mynd verður víst á, hvaðani í kommununi nettovinningurin er komin í 2022.
- Annars koma inntøkurnar frá nógvari og ógviliga ymiskari ferðslu, verður lagt aftrat.
Í Runavíkar kommunu verður víst á, at síðan havnirnar vórðu lagdar saman, hava inntøkurnar og nettovinningurin í 18 ár verið ávikavíst 247,683 og 99,127 miljónir krónur - ella ein fjórðingsmiljard í inntøkum og slakar 100 miljónir í nettovinningi.
Nýggja bryggjan á Bakka varð liðug og tikin í nýtslu nakað eftir ársskiftið í ár, tá Bakkafossur á fyrsta sinni kom á Glyvrar, og víðkanin av bryggjuni í Funningsfirði er at kalla komin undir land.
- Aðrar størri ætlanir fara vit frameftir at hoyra meiri um, so hvørt, sum tær verða fyrireikaðar og settar í verk, siga tey í Runavíkar kommunu í dag.
##med2##
