Eftir at hava staðið fyri Landsskjalasavninum árini 1980-92 og aftur frá 1993, bleiv søgufrøðingurin Jóannes Dalsgaard stjóri fyri mentadeildini í nýskipaða Undirvísingar- og Mentamálastýrinum.
Mikukvøldið klokkan 19.30 fer Jóannes á almennum fundi í Norðurlandahúsinum, sum Norrøna Felagið skipar fyri, at hugleiða um ein føroyskan mentapolitikk. Jóannes, sum hevur verið virkin í norrønum samstarvi, fer eisini at gera samanberingar við norrønu grannalondini, hvat mentanararbeiði og fyrisiting viðvíkur.
Sum tingmaður fyri Javnaðarflokkin, var Jóannes Dalsgaard valdur limur í Norðurlandaráðið tingsetuna 1991-92 og frá ársbyrjan 1995 varð hann limur í stýrinum fyri Norðurlendska Mentanargrunnin (Nordisk Kulturfond).
Jóannes Dalsgaard hevur eisini roynt seg sum yrkjara. Tað var tá ið hann í 1987 gav út yrkingasavnið »Framtíðin kemur ikki av sær sjálvari«. Stuttsøgur frá hansara hond hava verið prentaðar í ymsum bløðum og tíðarritum. Í fjør gav hann út søguna um »Fylking« og við støðið í hesum verkið, bleiv Jóannes Dalsgaard í fjør doktari.
Næsti fundur í Norrøna Felagnum verður hin 22. apríl, tá Jákup Thorsteinsson fer at halda fyrilestur undir heitinum »Heimastýri í fimti ár - yvirlit og meting«.
Fundirnir, sum Norrøna Felagið í Føroyum skipar fyri, eru í Norðurlandahúsinum og eru almennir.
Norrøna Felagið
í Føroyum
