Navnaskifti
Marner Jacobsen, forstjóri, heldur, at nýggja navnið hóskar væl til virksemið bankans, og frameftir verður munandi lættari hjá bankanum at samskifta á útlendskum marknaði.
- Gamla navnið lýsir ikki longur virksemið hjá fyritøku okkara nóg væl, nú longu fleiri ár eru liðin, síðan vit fóru frá sparikassavirksemi til bankavirksemi. Við hesum verður navnið lagað til virksemið hjá okkum.
Hann sigur, at formliga navnið nú er Eik Banki P/F.
- Hetta hevur verið í umbúna leingi, og í gjár varð so nýggi samleiki okkara samtyktur á eyðaaðalfundi.
Altjóða virksemi
Forstjórin sigur, at navnaskiftið er eisini ein staðfesting av, at virksemið hjá fyritøkuni er vorðið meira altjóða seinnu árini.
- Við dóttirbankanum, Eik Bank A/S í Keypmannahavn, lánsvirksemi og fíggjarligum áhugamálum í fleiri londum, er hent at hava eitt stutt og lætt navn – eitt navn, ið bæði kann sigast á føroyskum og flestu øðrum tungumálum.
Marner vísir á, at eik hevur sama týdning á føroyskum, íslendskum og norskum.
- Við navninum fylgir eisini ein nýggjur grafiskur samleiki. Hesin ber við sær, at búmerki, litir, bókstavir og sjálv sniðgevingin kring samskiftið og bankavirksemið verða nýggj.
Sama rótfesti
Forstjórin leggur dent á, at hóast broytingina, hevur nýggi grafiski samleikin og navnið kortini rót í sparikassanum og út við 175 ára longu søgu hansara.
- Hóast navnið er nýtt, er talan um sama peningastovn – við somu góðu starvsfólkum og kappingarføru tænastum.
Forstjórin, Marner Jacobsen, sigur seg vóna, at viðskiftafólk fara at taka væl ímóti nýggja samleikanum.
