Í Danmark eru tey aftur farin til natúrliga háttin at reinsa sár, nevniliga við nýtslu av livandi larvum. Sjúkrarøktarfrøðingur heldur, at hetta eisini eigur at verða nýtt í Føroyum. Nýtslan av livandi larvum til at reinsa sár hjá sjúklingum á donskum sjúkrahúsum er fleirfalda seinastu árini.
Læknaliga serfrøðin í Danmark hevur viðurkent, at eingin heilivágur er betri til at reinsa sár enn natúrlig reinsan við livandi larvum, sum verða løgd undir bindingina hjá sjúklingunum.
Larvurnar loysa tað deyðu húðina av og eta hana síðani, og hetta hevur ongan skaða á tað livandi húðina. Larvurnar verða beinleiðis innfluttar úr Fraklandi, og eru at finna í smáum teposum, soleiðis at tað er lættari hjá sjúkrarøktarfrøðingunum at handfara larvurnar.
Tað er í stóran mun ein etiskur spurningur, tá ið sjúkrahús velja at nýta hesa viðgerðina, men eingin ivi er um, at tað er tann mest effektiva viðgerin.
Esther Simonsen er sjúkrarøktarfrøðingur í starvi á Landssjúkrahúsinum, og hon hevur áður arbeitt við júst hesum háttinum at reinsa sár.
-Eg haldi, at tað er ein ótrúliga effektivt, og haldi avgjørt, at vit eiga at umhugsa hesa viðger í Føroyum, sigur hon.
Ein orsøk til, at hendan viðgerðin ikki hevur funnið sín veg til Føroya enn kann verða, at viðgerðin er ógvuliga kostnaðarmikil.
