Í verandi líki kappast 16 lið í Champions League í hondbólti hjá monnum.
Hetta ætlar evropeiska hondbóltssambandið, EHF at broyta. Framyvir vera tað 24 lið, ið koma at kappast í Champions League.
Tað verður ikki talan um tveir innleiðandi bólkar við átta liðum. Framyvir verður talan um seks bólkar við fýra liðum. Tvey tey ovastu í hvørjum bólki vinna seg víðari til eitt millumumfar, meðan tvey tey niðastu í hvørjum bólki kappast víðari í EHF European League.
EHF ætlar eisini at droppa undankappingardystir til Champions League bólkaspælið.
EHF-forsetin, Michael Wiederer sigur sambært danska TV2, at ætlanin er eisini at broyta kappingarleistin hjá kvinnunum. Fyribils heldur FINAL FOUR vikuskiftið fram í týska býnum, Köln tey komandi árini.
Í løtuni kappast tríggir føroyskir landsliðsleikarar í Champions League. Óli Mittún hjá GOG, Hákun West av Teigum hjá Füchse Berlin, og Pernille Brandenborg hjá Storhamar.
Við 24 liðum í Champions League eru sannlíkindini fyri, at fleiri føroyingar fara at kappast í Champions League eisini størri.
