Tað hevur vakt eitt sindur av ansi, at vit herfyri skrivaðu, at brasilski áleyparin hjá B68, Marcelo Marcolino, kanska var tann fyrsti útlendski spælarin, ið hevur skotið hat-trick í einum 1. deildardysti í Føroyum (tað gjørdi hann fyri trimum vikum síðani móti ÍF).
Síðani tá hevur ein lesari gjørt vart við, at onglendingurin Peter Frain, sum spældi við NSÍ miðskeiðis í áttatiárunum, skeyt eitt hat-trick móti B68 í 1987, tá NSÍ vann 3-0.
Nú hava vit so frætt úr Vági, at eisini har er ein maður, sum ikki er av føroyskari ætt, og sum fleiri ferðir hevur skotið trý mál í sama dysti í føroysku 1. deild.
Talan er sjálvandi um Egill Steintórsson ? íslendingurin, sum hevur verið í Føroyum í nógv, og sum hevur spælt við bæði TB ? sum hann bleiv føroyameistari við í 1987 ? og VB.
Egill gjørdi nógv um seg sum málskjútti í seinnu helvt av 80-unum og nakað inn í 90-ini.
Serliga í 1989 var hann vandamikil, og tað árið gjørdi hann ikki færri enn trý hat-trick í somu kapping!
VB vann tað árið 4-0 á HB í Gundadali, og Egill Steintórsson skeyt trý av málunum hjá vágbingum. Sama árið var B36 í Vági og tapti 0-4. Her gjørdi Egill ikki mætari enn at skjóta øll fýra málini. Og tá VB vann 3-0 á LÍF í Leirvík, var tað aftur Egill Steintórsson, sum átti øll málini!
Tvey ár seinni, í 1991, gjørdi Egill eitt hat-trick afturat, tá VB var í Miðvági og vann 3-2 á MB.
Tað er eisini væl møguligt, at Egill Steintórsson skeyt okkurt hat-trick fyri TB, sum hann spældi við í 1986 og 1987, men vit vita ikki, hvørjum dysti hetta hevur verið í.
Tað er tað kanska onkur annar lesari, ið veit at siga okkum.
Í øllum førum kunnu vit staðfesta, at Egill Steintórsson hevur skotið fleiri hat-trick í føroysku 1. deild. Vandamikli íslendingurin, sum nú hevur verið so leingi í Føroyum, at hann í fótbóltshøpi er at rokna sum føroyingur, spælir framvegis. Hann er venjari hjá TB í 2. deild, og har hevur hann higartil í ár skotið tvey mál?
