Hann hevur verið í spælinum leingi. Bæði sum spælari og sum venjari. Hann er høgur av vøkstri, kraftigur og sær í nógvar mátur út sum ein fyrrverandi hondbóltsspælari. Hann er ikki bangin fyri at seta orð á sínar tankar og síni mál.
Henrik Gerster stóð sunnudagin á fyrsta sinni á odda fyri VÍF. Hann kom í venjaratoymið saman við Jan Ottosen stutt fyri jól, men í trimum dystinum lá bara eitt stig eftir í Vestmanna. Tað endaði við, at leiðslan í VÍF sendi Jan Ottosen heim og gav Henrik Gerster ábyrgdina sum høvðusvenjari.
Fyrsti dysturin var móti KÍF, sum vann dystin greitt 36-27.
Hann er vónbrotin av úrslitinum, men hevur als ikki mist mótið.
- Vit detta sundir sum lið, og tað eri eg vónbrotin av. Har er nógv at arbeiða við og tað skulu vit í gongd við umgangandi. Vit fara til hálvleiks aftanfyri við fýra málum, men brenna tríggjar upplagdar møguleikar fyrstu minuttirnar í øðrum hálvleiki. Høvdu vit skorað upp á teir, so var munurin ikki meir enn eitt mál, og spælararnir høvdu trú upp á sjálvar. Í staðin endar tað við, at vit koma aftur um við sjey málum og missa stevið. Liðið dettur fullkomiliga sundir seinastu fimm minuttirnar. Tí blívur munurin heili níggju mál, grieður Henrik Gerster frá.
Hóast tapið blívur stórt, so er nýggi venjarin við gott mót, og tað eru spælararnir eisini.
- Eg fái ikki úttala meg um støðuna í felagnum áðrenn eg kom til, men her er nógv at taka fatur í. Vit hava júst havt eitt gott prát í skiftirúminum. Spælararnir trúgva upp á, at vit kunnu eina gongda leið og tað skal gjarna henda skjótt, sigur Henrik Gerster
Hørð kapping
Tað er ongin skandala at tapa fyri KÍF, sum umframt at verða oddalið, eisini verður mett av fleiri sum FM favorittur, tí liðið er so væl samanspælt. Alíkavæl er Henrik Gerster argur um tapið, tí KÍF heur nú mest sum sett seg á annað finalu plássið. Tí so er bara eitt pláss hjá hinum at kappast um.
- Við tapinum hava vit næstan givið KÍF annað finaluplássi, og tí blívur kappingin um hitt plássið nógv harðari nú, sigur Henrik Gerster
Hann nevnir Kyndil, StÍF og H71 sum lið, ið kappast um hitt finaluplássið. Venjarin metir at VÍF kann tá teir eru upp á tað besta spæla við móti KÍF, men ásannar somuleiðis at liðið fellur saman, so dettur alt sundir.
- Tá vit fáa álopsspæli at rigga í dag, tá sært tú at vit kunnu verða við í toppinum í føroyskum hondbólti, men tá liðið so fellur saman, so spæla vit als ikki sum eitt lið, ið hevur uppiborið eitt pláss í FM finaluni, greiður Henrik Gerster frá.
VÍF hevur 15 stig á triðja plássi. Tað er bara eitt stig færri enn H71, sum liggur á øðrum plássi. Eisini teir taptu um vikuskiftið.
Vil hava smíl og gleði
Hernrik Gerster stendur hendur í favn og lenar seg móti vegginum í høllini í Vestmanna. Eyguni leita í løtum út á vøllin, har 1.deildarliðiðini hjá VÍF og KÍF spæla. Spurdur munin millum hann og Jan Ottosen steðgar Henrik á og hyggur út í luftina.
- Tað mást tú nokk spyrja spælararnar og leiðsluna í felagnum um, men eg havi fleiri praktiskar royndir sum hondbóltsspælari. Eg veit ikki um mínir menniskjaligu eginleikar eru øðrvísi enn teir hjá fyrrverandi venjaranum, men eg eri til reiðar at behandla spælarar ymiskt, fyri at behandla teir eins, sigur Henrik Gerster.
Eitt av høvðusmálunum hjá nýggja venjaranum er at fáa smíl og gleði í hópin hjá VÍF eisini.
- Eg vil hava fleiri smíl og meiri gleði á liðið, tað sær út til at teir hava sakna tað, leggur nýggi VÍF venjari afturat.
Ein onnur avbjóðing hjá Henrik Gerster er at samansjógva eina fjølbroyttan hóp.
- Vit hava fleiri ymiskar týpur av spælarum á liðnum, og avbjóðingin hjá mær er at fáa øll høvdini at sita eins og arbeiða saman. Tað tekur meiri enn 14 dagar. So kemur tann poleraði hondbólturin seinni, sigur Henrik Gerster
Málið er framvegis at koma í eina FM finalu. Steypakapping kemur í aðru røð, men vinna teir í fjórðingsfinaluni, so er bara ein dystur til finaluna.
- Vit hava ein torføran dyst móti Neistanum í fjórðingsfinaluni, og koma vit víðari, so er ikki so langt á mál. Spurningurin er bara um vit klára at venda gongdini áðrenn. Tá hevði eg heldur raðfest at verið í eini FM finalu, tá vit vónandi hava nøkur prosent eyka at geva av, sigur Henrik Gerster at enda.
Komandi dysturin hjá VÍF er móti StÍF í Vestmanna.
