Seinastu dagarnar er stríðið millum Ísrael og hernaðarligar palestinesiskar bólkar harðnað ógvusliga. Meðan rakettir úr Gaza regna niður yvir Ísrael, hevur Ísrael í dag hildið fram við sínum rakettálopum í Gazageiranum.
- Tað eru rakettálop alla tíðina, dag og nátt. Tað er hopleyst at sova, sigur Sami Abu Salem, journalistur, sum býr í Gaza, við norska tv2. Hann hevur upplivað ísraelsku álopini so mikið nær, at tann eina rakettin rakti bert 200 til 300 metrar frá húsunum, har hann býr. Alt húsið skalv, og børnini skríggjaðu og grótu.
Eftir meira enn einum ári, har tað hevur verið hampiliga friðarligt í Gazageiranum, eru Ísrael og Hamas nú aftur í holt við ein blóðugt stríð.
Tey fyrstu álopini byrjaðu mánadagin, og síðan eru fleiri hundrað rakettir skotnar úr Gazageiranum móti málum í Ísrael, samstundis sum Ísrael hevur svarað aftur við loftálopum í Gaza, har oyðileggingarnar longu hava verið stórar, og fleiri fólk eru deyð.
- Eg eri ræðslusligin. Vit hyggja alla tíðina upp á himmalin fyri at síggja, nær næsta rakettálopið kemur, sigur Sami Abu Salem, sum býr norðalaga í Gaza saman við konu og fýra børnum. - Øll eru ræðslusligin, og eg vóni, at álopini steðga skjótt, sigur hann.
Í morgin er dagurin, har Ramadan endar. Hetta er størsta hátíð hjá muslimunum, og undir vanligum umstøðum høvdu gøturnar í Gaza verið fullar av fólki. Men, í dag eru gøturnarfólkatómar. Tað er eingin, sum torir at vera úti.
Heilsumálaráðið í Gaza upplýsti í dag, at 56 fólk hava latið lív í Gazageiranum, harav 14 eru kvinnur og børn. Sami Abu Salem stúrir fyri, at talið av deyðum kann gerast nógv størri, um stríðið dregur út. Tað búgva tvær miljónir fólk í Gaza, og øll búgva rættiliga tætt. Tí kann eisini rakettálop gera stóran skaða og kosta nógv mannalív.
Heima við hús royna Sami Abu Salem, kona og børn at vera positiv, tí tey vilja ikki ræða børnini.
##med2##
- Vit smílast og siga, at alt fer at ganga væl. Eg vil ikki vísa teimum, at eg eri bangin, sigur hann og vísir á, at børnini, sum eru 2, 7, 10 og 15, gerast ræðslusligin hvørja ferð tey hoyra eina rakett.
Hann vísir á, at seinastu dagarnar hevur tað verið trupult at sovið um náttina, tí brestir og spreingingar hoyrast alla tíðina. Børnini tora ikki at vera einsamøll á sínum kømrum, so øll samlast í seingini.
Sjálvur minnist journalisturin væl kríggið í 2014, tá fleiri túsund fólk lógu eftir á. Men, hvat heldur Sami Abu Salem fer at henda teir næstu dagarnar?
- Eg trúgvi ikki, at hetta steðgar enn, og eg stúri fyri, at stríðið fer at vara líka leingi sum seinast, leggur hann aftrat í samrøðu við tv2.no.
In.fo kann leggja aftrat við útlendskum miðlum sum keldu, at higartil eru í minsta lagi seks sivilfólk deyð í Ísrael av rakettum hjá Hamas, og haraftrat hevur ein ísraelskur hermaður latið lív, tá jeepur hansara varð raktur á markinum til Gazageiran.
Á tíðindafundi í dag, sum norski miðilin VG eisini luttók á, segði talsmaðurin fyri ísraelska herin, Jonathan Conricus, at Ísrael hevur gjørt av við yvirgangsmenn hjá Hamas, men hann legði aftrat, at hesir krógva seg millum sivila fólkið. - Vit royna at skipa so fyri, at so fá sivilfólk sum gjørligt verða rakt í álopunum, segði talsmaðurin á tíðindafundinum.
##med3##
